پھ بلوچ راجا نواب خیر بخش مریء کلھ

اے کلھ اردو زبانا ماں انٹر پنچ ماہ پیسر شنگ بیتگ۔ من لھتے خاصیں ٹـکـّر گچین کتگنت و آھانء بلوچی بزانت وانؤکانء ندرنت۔
بازین گال پھ نبشتھ کنگء آسودگیا ٹگلینگ بیتگنت۔ البت من جھد کتگ کھ اصلی لؤٹ چھ دستا در مھ کپنت۔

کؤلمیر

منی خیالا اے وھدی چھ پھکاں اھمتریں کار پھ بلوچ راجا وتی آزادیء گرگنت۔ مئے مردم حسابا کم نھ انت، مئے زمیں چھ بازیں مغرب و مشرقء ملکان کمتر نـھ انت۔ وسائل ھم ھستنت۔ ھنچؤکھ شما اشکنگا ات زؤرگریں پنجابی ھم گشنت کھ (بلوچستان) مالا مالنت۔ زبان، رسم رواج ھم مئے وتی ھستنت۔ زؤرا ھم ما چھ پنجابی راجا پدا تر نھ انت۔ ۔ آ حبرا بل کھ انسان گؤں انسان بروبرنت، راج گؤں راج بروبرنت۔ اشاں امپریالسٹانء کمک گؤننت۔ اگر آھانء کمک مبیتینت اشاں مارا زؤر داشت نھ کتگت۔

غلامیء گال کھ مئے باروا کار بندگ بیگا انت شاید بلوچ چھ زھرا وتا غلام گشنت۔ انگریز کھ اشانء واجھکار بیتگنت و مان اے دمگا امریکاء دلال؛ آھاں ھم مارا وتی غلام نھ گشتگ۔ آھاں مارا سیمی اٹانامس ٹک و مردمش گشتگ۔ انگریزانء زمانگا گؤں ما انچو ناروائی ھم نھ بیتگ۔ مارا پھ وتی سلاحاں لائسنس پکار نھ بیتگ، چھ ما مالیاتش نھ گپتگ و مئے زمیناں مئے وتی مردماں کشت کشار کتگ۔

پاکستانء اڈ بیگا چھ رند ھم ما چیزے وھدا آزاد بیتگنت۔ بلے رندترا مئے سرا فوجی یورش کنگ بیت۔ بلے پدا ھم ما آ ڈؤلا کھ غلام گشگ بیت نھ بیتگنت۔ مئے ٹکـّآنء فیدریشن بیتگ یا اش کھ ٹک وتی جاھا آزاد بیتگنت۔

ھنـّي جام چھ گشگا نھ تـُسیت کھ (بلوچستان و پاکستان) پھ دگرا لازمنت؛ اے ردنت۔ ما ھچبر پھ یکا دگر ضروری نھ بیتگنت۔ (جامء) اے حبرا ھچ تاریخی راستی مان نیستنت۔ بلوچ و پنجابی ھچبر یکا دگرء درد و شادھیا شریک نھ بیتگنت۔ پنجابی آسودگیں زندگیء غلامنت۔ اشانء زمیں و آپء سوبا مغل ببنت یا انگریز اتکگنت اشانء ملکش کپتگ، بلے (پھ وتی آزادیء پچگرگا جنگ کنگء بدلا) اشاں آھانء خدمتگزاری کتگ۔ اے بلوچانء ڈؤلا عزت پرست نھ انت۔ آسودگ پرستیء سوبا لاپش زنڈ ھم پیتگ۔ اشانء اقا ھم فرمانبرداریء سوبا اشانء سرا مھرباننت۔ پنجابی راجا چھ فرمانبردارتر اے دمگا دگھ ھچ راج نیستنت۔

بلوچستان و پاکستانا پھ یکا دگرا ھما کس ضروری گشیت کھ آ وتی جندا عزت نھ کنت۔ اگر کسے وتی جندا عزت بکنت پھ آئی مرگ چھ اے ڈؤلیں حبرء کنگا شـَـرترنت۔

اے وھدی بلوچ پھ وتی آزادیا جنگا انت۔ پاکستان گشگا انت کھ ما بلوچستانا ترقی دیگا انت۔ ما ترقیء لؤٹؤک نھ انت۔ (آزادیا چھ رند) ما وتا وت ترقی دہ انت۔ قدرتا ھم مارا ضروری ترقی معدنیاتء درؤشما داتگنت۔

حبرا چھ حبر پاد کیئت؛ اے مارا گشنت کھ اے سردارظالمنت، جاھلنت۔ حقیقتا مارا سوشلسٹاں گشتگ کھ مئے چاگرد بنداتی اشتراکی چاگردنت۔ آ گشنت آھانء اشتراکی رواج نؤکیننت، ٹکـّان اشتراکی رواج کؤھنیننت۔ عالم و دانشور شوھازکاری بکننت گڑا سرپد بنت کھ بلوچ چاگردا برابری گؤں رگ و ریشگاں ھستنت۔ ٹکـّانء کماش اگر ظالم ببیتنت گـڑا مھلوک گؤں سرداراں ھؤر پاکستانء خلافا نھ جیڑگا تنت۔

آ مروچی جنگا انت؛ پھ وتی بھرء پچگرگا جنگا انت، وتا وطنء وارث لیکنت جنگا انت۔ مروچی پھ آھاں آزادی چھ ھرچیزا اھمترنت۔ اگر ضرورتء ردا سرپدی بئیت گڑا آزدی (ضرور) گرگ بیتنت۔ باز کس گشنت کھ سنگا گؤں سرا میڑینے سر پروشیت۔ من گشان آزادی انسانء ضرورتے انت۔ پرے ضرورتا سر گؤن سنگا ھم میڑینگ روا انت۔ بلوچ سرا گؤں سنگا میـڑینگا بس مھ کننت۔ اگــــر بلوچ بس بکــــننت گـڑا پنجـــــاب (بلوچستانء مالا گؤں) دوئیں دستاں گؤر رؤپ کنت۔

مارا چارگی انت کھ چؤنین جاھلیں راجیا گؤں مئے جنگنت۔ آ دگرء غلامیا بد نھ لیئکیت، دگرا کشگا ناروا نھ منـّيت۔ حتی مذھبا ھم پھ وتی مقصدانء پیلو کنگا کار بندیت۔ چمشکا بلوچ گؤں اشی ھنچؤ بجیڑیت کھ باندات ھر پنجابی مات وتی چکا بگیشیت 'منی چک فوجا مرو؛ سوچی' کشگ بے۔

گشنت کھ چنگیزخانء فوجا جنگ ھلاس کت و شپا اردو کت گڑا فوجیان ھریکے پھ کارے دستگٹ بیت؛ کسے نان پچگا، کسے عبادت کنگا؛ ھر کس دست گٹـّت۔ ھمے درگتا یکے چھ خدا لؤٹگا ات کھ اے خدا منا سھربدے۔، مال و زر بدے۔ چنگيزخان کموک وھدا اشیء حبر گؤشداشتنت پدا آئيا یک شھماتے پرکشتی و گشتی 'ناسرپد خداھا دلسیاہ کنے پھ مال و زر؟ اگر لؤٹگی انت گڑا ھمراہ بلؤٹ۔ مارا سپاھیگ پکارنت'۔
نیں پاچ آئیا بلوچاں ھم سپاھیگ پکارنت کھ گؤں پنجاب جنگ بکننت۔ مال و ملکت مارا مُچّـنت۔ مئے زمینء چیر جھ مالا پـرّنت۔

وتی سراں گؤں دلگؤش ندرکناں ببئت، کسانین جیڑھاں پھ باندات بلـّت اولا چھ اے مزنتریں مشکلا وتا رکـّينت۔
اگر کسے وتا راجدوست گشیت گڑا باید آزادی بلؤٹیت۔ آ کھ وتا نشنلسٹ گشنت و صوبائی خودمختاریء گپا جننت گڑا آھانء راجدوستیا من سرپد نھ باں۔ لھتے کس گشنت کھ فلاں پارٹیء باسک آزادی لؤٹنت بلے آھانء سرکشی کنؤک پاکستانء سیاستا منؤکنت۔ ادا زانگ لؤٹیت کھ ضرورت چے انت کھ مردم ھنچیں پارٹیا ھؤر بماننت؟۔