پاکستان و طالبانء سازش پھ بلوچستانء لگتمال کنگا

نبیسؤک: پیٹر تاچل
رجانک: کؤلمیر نمیران

چیزے سالنت کھ پاکستانا بلوچستانء مھلوکء سرا وتی یورش تیز کتگ۔ ھزاراں کس کشگ، بندیگ و ایزا دیگ بیگا انت۔ فوجا زھری سلاح ھم کار بستگنت۔ نزیگ صد ھزار چھ وتی میتگاں درپدر کنگ بیتگنت و پاکستان اشانء بزگیاں ڈالچار کنگا انت؛ پھ اشانء کمکا سازمان ملل و دگھ خیراترسانانء دیما دارگا انت۔

ھوریا پاکستانء واگدار قدرتء داتگیں بلوچستانء میراث؛ گس، تیل، اشکر، کوپرو طلاھا رؤپگ برگا انت۔ بلوچستانء قدرتی میراثء تھا 19 ٹریلین کوبک فیٹ گس و 6 ٹریلین برل تیل ھؤرنت۔

چھ باورا گیئشتر وسیلھانء واھند بیگء باوجود بلوچستانء مھلوک غریباں چھ غریبترنت۔ گیشتر مھلوکا الکاپیں وراک نھ رسگا انت؛ ناوانندہ انت و کـُـٹگاں زند گؤزینگا انت کھ اودا نھ برق ھستنت نیکھ سلھین ورگی آپ۔

بلوچستانا جؤکینگ و ایرمؤشیا چھ رند آئیا پنجابء کالونیے جؤڑ کنگ واستا پاکستان یکے سـلــّيں پندلے سرا کار کنگا انت۔ پندل اشنت کھ بلوچ وتی سرڈگارء سرا اقلیتـــا آرگ ببنت؛ ھنچؤکھ اصلی امریکائی ماں امریکا و آسٹرالیاء تؤکا ابروجنیز۔ اے پندل ماں لھتے جاھاں پھ درور کوئٹھ کھ اؤدا دریں مردم گیشترنت سؤبیں بیتگ۔

یک دگھ سلاحے کھ پاکستان پھ بلوچانء گار کنگا کار بندگا انت آ فرھنگی جبرنت۔ اسلام آباد فکر کنت کھ آھیء سرا 'بے فرھنگیں' بلوچان فرھنگ سکــّارینگء 'مقدسیں' ذمھ داری کیئتنت۔ بلوچی گپ جنؤکیں مردماں 'الکاپیں پاکستانی مسلمان' جؤڑ کنگء واستا آھاں دریں زبان اردو رواج داتگ۔ وانگ و زانگء بنجاھاں اردو ضروری کنائینگ بیتگ۔

بلوچانء فرھنگا بدلینگء یک دگھ راھے کھ کار بندگ بیگا انت آ لبرل و سیکولر بلوچ چاگردا مذھبا رواج دیگنت۔ تـُرند و ھُـردچاریں پاکستانء اسلامی رواجا وانینگء واستا ماں بلوچستان بازیں مذھبی وانگجاہ سرکارء خرچان سرا کار کنگا انت۔

بلوچ راجپھازداکٹر نصیر دشتیء گشگء پدا؛ دریں زبان و مذھبء زؤرا فکراں غلام کنگء اے رھبند بلوچ مارشت و راجی پچـّارا تراشگ و دؤردیگء تؤجیلےانت۔

آ گشیت؛ مردمانء وتی چاگردی رھبند و باورانء جاگھا دریں آرگء مانا آھانء سرجمیں پجّـارا مٹینگنت۔ بے مٹـّيں سیکولر پجّـار بلوچ راجی جنبشا زندگ دارؤکنت۔

یک غلامیں راجے کھ نیں دگرانء سرا ظلم کنؤکے جؤڑ بیتگ؛ برطانیاء دستء چیرا بیوکین اے ملک ھما انگریزانء رھبندا گؤں ھمردیں پندلاں بلوچ مھلوکء سرا ظلم و زؤر کنگا انت۔۔۔ بلوچستانء تؤکا وتی زؤراکیاں برجاہ دارگء واستا پاکستانء فوج 3 نؤکیں فوجی بنجاہ ماں کوھلو، ڈیرہ بگٹی و گوادر اڈ کنگا انت۔ فوجا گیئش کنگ بلوچستانا زؤرگرگء اسلام آبادء پندلانء خلافا بلوچ مھلوکء اؤشتگء ثبوتنت۔

افسوزنت کھ میاں استمانی راجانء جواب بس بے کرد و بے تواری بیتگ۔ وتی عاقبیتء فیصلھا وت کنگء ضرروتا ڈالچارکنگا گؤن ھؤر آھاں اشتگ کھ بلوچ مھلوک لگتمال ببنت۔ جنگانء خلافیں حرکت ھم بے پرواہ انت چیاکھ بلوچاں امریکا گشگا نھ انت۔ اگر مغربا مسلمان بھ کـُشتیننت گـڑا چھ چپ و راستا مھلوکا لانکارتگت۔ بلے پاکستانء مسلمان کھ بلوچ مسلماناں ڈلگا انت آھاں ھچ پرواہ نیستنت۔

-------

وتی 1947-48ء آزادیا پچگرگ واستا بلوچستانء جھدء سرا مغربء نادلگؤشی شرمناکنت۔ برطانیا و امریکاھا ٹروریزمء خلافا جنگ کنگء واستا پاکستانء کمک پکارنت؛ چمشکا آھاں پاکستان سلاحبند کتگ و بلوچ مھلوکا پرؤشگء رضایت داتگ۔

بلوچستانء خلافا پاکستانء جنگا طالبانء واک گیئشتر کتگ۔ جنگ وجدلیں جاوراں چھ طالبان سوب چست کتگ و ماں آ ھندان وتی بنجاہ اڈ کتگنت۔ چرے بنجاھاں طالب لبرل بلوچاں ترسینگا انت و جھدا انت کھ وتی رھبندا بلوچستانء تؤکا رواج دی انت۔ پاکستان پمشکا طالبان ھِلـّگا انت کھ آ بلوچــاں لگتمال و آھانء آزادیء جنبشا پــــرؤش دیـگء واســتا (پاکستانء فوجا چھ رند) دومی واک ببیتنت۔

بلوچستانء تھا طالبانء بنجاھانء دومی کار افغانستانء جمھوری دولتا پرؤشگ واستا حملھ کنؤکانء چیئر دیگنت۔ کابلء دولتا دستگرگ و پدا کـــٹریں رھبندے رواج دیگء پندلا پاکستانء فوج و چاریگ چیئرکائی سازگا انت۔ ۔۔

اگر (برطانیاء) نؤکیں دریں جاورانء وزیر ڈیوڈ میلیـبنڈ طالباں و کـٹریں مسلمانا چؤپگ لؤٹیت گڑا آ باید سازمان ملل و یوروپی اتحادا زؤر پر بدنت تا بلوچستانء سرا زؤراکیا بند کنگ و آھانء وتواجھیں سرکارے جؤر کنگا گام چست بکننت۔

انگریزی نبشتانکا ادا بھ وانت http://www.tribunemagazine.co.uk/Templates/feature1.html