نشنل پارٹی بیھار داتگ کھ اگر چھ کوئٹھء کشی ھند کلی اسماعیل دستگیر کتگیں بلوچ 24 کلاکا ویل کنگ نھ بیتنت، گڑا آ بلوچستانء سڑکاں بند کننت۔ اے گپ پارٹیء سریں منشی حاصل بزنجو، بلوجستانء پارلمانا سرکار مخالف ٹؤلیء سرؤک کچلول علی و اسمبلیء باسک جانمحمد بلیدی گؤں وتی ھمراھاں ماں کوئٹھ پریس کلبء دیما جتگ۔ترانگ بھ کپت کھ چارشنبھء شپا یک پولیس افسرےء کشگء سوبا کوئٹھء بلوچ ھند کلی اسماعیل پاکستانء رستگاری واکاں انگرّ کتگ و چھ اؤدا 300 کسا چھ گيئش تنے وھدی دستگیر کتگنت۔
گؤں حالکاراں وتی ترانانء تھا اشاں گشتگ کھ اگر کسے قتل بکنت آ نھ رؤت لؤگیا چیئر نھ بیت و نیکھ سرجمیں میتگء سرا اشیء ڈوبھ جنگ بیت کنت۔ اگر مردم رسگا ویل کنگ نھ بیتنت گڑا آ سول نافرمانیء جنزے بندات کننت۔ اشیا چھ رند سرکارا بلوچستانء ھر کھؤلا گؤں جنگ کنگ لؤٹیت۔
اشاں وتی حبر گیئش کتک؛ کلی اسماعیل سرا یورشء اصلی واھگ بلوچ مھلوکا چھ کوئٹھ تاچینگء سرکاری پندلے انت و اے پندلا آ پھ سوبینی نیئلنت۔
ھمے ردا بی اس او (آزاد) ھم جمعھء روچا کوئٹھ پریس کلبء دیما ظاھری پیش داشتگ و سرکارء خلافا ترندیں کوکار جتگ۔ گؤں مھلوکا وتی تراناں کوئٹھء صدرا و بنجاھی کمیٹیء باسکیا گشتگ کھ یورشء دورانا مھلوکء ستر پرؤشگ بیتگ و جنیں آدماں گؤں بے احترامی کنگ بیتگ۔ اے ناروائی پاکستانء وحشی درؤشوما دنیاء دیما درا کنگا انت۔
بی ان پیء سرؤک واجھ عطاءاللھ مینگل ھم کلی اسماعیلء سرا رستگاری واکانء یورش ایئر جتگ و گشتگ کھ اے یورشا نزیک 500 کس دستگیر کنگ بیتگنت۔ آئی چھ یو ان او لؤٹ کتگ کھ بلوچ مھلوکء خلافا پاکستانء ناروائیانء دیما بداریت، اگھ نھ سرجمیں بلوچ راج پاکستانء خلافا جست بیتنت۔
میر مھیم خان بلوچ، محمد اکبر مینگل و ایلم (براھوی) اتحاد ھم کلی اسماعیلء سرا یورش سک ایئر جتگ۔
حال و عکس جھ توار 29 ستمبر، 07
هیچ نظری موجود نیست:
ارسال یک نظر
وتی کلوا چێرا نبیس إت