اعلا حضرت سلیمان داؤد ماں دیوان و حالتاکی بیاناں گشگا انت کھ پاکستانء دستا بلوچستانا پھ زؤر گرگء خلافا سرجم کتگیں کیس اے وھدی پھ زرّا مھتلنت۔ اے ردا گؤں وکیلاں گپ جنگ بیتگ و آ یک تا یک و نیم ملین پاؤنڈ بزاں پانزدہ کروڑ روپیھ لؤٹگا انت۔ اے رقم یوکا کیسا داخل کنگء واستا انت۔ مزنیں خرچ کیسا اشکنگ و پیشیانء خرچنت۔ادا مردم بھ چاریت کھ آ 110 سردار کھ قلاتا سرجم بیتگ تنت و بلوچستانء کیسا میاں استمانی دادگاھا برگء فیصلھ اش کتگت اے خرچا پورہ کنگء جگراش ھست یا نھ!۔ خان صاحب گشگا انت کھ چھ آ سرداراں یکیا ھم تنے وھدی ھچ مالی کمک نھ کتگ۔ چمشکا خان صاحب چھ بلوچ الس دلمانگنت کھ آ کمک بھ کننت۔
گؤں شمالی امریکاء بلوچی سوسائٹیء سروک داکٹر واحد بلوچ ھم خان صاحب ھمے واھگ پدّر کتگ و اے ردا بلوچستان لیگل فنڈےء واستا مھلوکء دلگؤشاں لؤٹگا انت۔ زانگ بھ بیتنت کھ در پھ دریں بلوچ جھدکارانء کمک سیاسی انت و بس۔ انچوکیں بلاھیں رقمےء درگیئجگء جوازت اشاں نیستنت و اے ڈؤلا تا دگھ صد سال ھم ودارکنگ بھ بیتنت۔
چمشکا بلوچ سیاسی فکران بایدنت کھ خانصاحبء سرا اے کیسء باروا ناروائیں زؤرپر مھ دینت۔ آ وتی گؤما وت پھ مھلوکء شرتریا الــّما گامگیچ زیریتنت۔ اگر اے پڑا گیشتر وھد زوال کنگ بیت گڑا بلوچستانء سیاستا ضروریئیں دلگؤش نھ رسیتنت و سؤب بلوچ دشمن چست کننت۔
بلوچ چاگردا ضروریتریں در ھستنت کھ خانصاحبا آھاں پر کنگء توان ھم ھستنت۔ چؤکھ میڈیا۔ اگر اشیء سرا سرمایھ جنگ ببیت آ وت ھمنچؤ زر پیم کنتنت کھ بلوچستانء کیس پھ فنڈنگ مھتل نھ بیتنت۔ خانصاحب اگر یک ٹلوژن چینلے پچ بکنتنت شرتر چھ اشنت کھ بلوچستانء کیسا گؤں پنڈ سنڈ داخل بکنت۔ ھؤریا بلوچستان گؤرنمنٹ ان اکسائل وتی سروکیا اگر جؤڑ بکنت ھم پھ اشی زر پکار نھ بیتنت۔
هیچ نظری موجود نیست:
ارسال یک نظر
وتی کلوا چێرا نبیس إت