ایرانء دستء چیئرء کردستانء تھا پھ وتی راجا سلاحبندی جھد کنؤکیں ھؤر بند پژاکء سروک واجھ عبدالرحمان حاجی احمدیء گپتران یکشنبھء بیگاھا گؤں صداء امریکاء فارسی زبانء مراگشا گؤشداشتنت۔ آئی مان وتی گپاں ایرانء تھا کردانء سرا بیتگیں زؤراکی و وتی ھؤربندء لؤٹانء سرا چمشانک دات۔پژاک چدا پیسر ماں ایرانا فدرالزم لؤٹتگ و ھمے مقصدا جھد کتگ بلے آئي وتی دؤشیگیں گپاں ظاھر کت کھ نیں آ پرے آسرا سر بیتگنت کھ فدرالزم آھانء مشکلاں حل نھ کنت چمشکا نیں آ کنفدرال سیستمء واستا جنگ کنگا انت۔
ایران پژاکء سرا ڈوبھ جنگا انت کھ آ ترکیء دستء چیئر کرداں گؤں ھؤر پھ مزنیں کردستانےء اڈ کنگا جنگا انت۔ ھمے سوبنت کھ پژاک ترکیء کردانء لیڈر عبداللھ اچالانا وتی رھبر لیئکنت۔ اے ردا واجھ حاجی احمدی گشت کھ آ عبداللھ اچالانا وتی رھبر نھ منـّنت البت آئی فلسفھء منؤکنت۔
اگر پژاکء بنی لؤٹء تھا اے بدلی شری سرا چمشانک دیگ بھ بیتنت گڑا مردم پوہ بیت کھ کرد سیاسی جھدکارانء اے ٹؤلیا شریں گامے چست کتگ۔
کنفڈریشن یک راھبندے انت کھ ایرانء کرداں گؤں ترکی، عراق، سوریھء کردان نزیک کنگا گؤں ھؤر آھاں چھ ایران ھم نھ سندیت۔ بزاں یک نیمگیا کرد ایرانء آدگھ راجانء کشا اؤشتات کننت و آدگھ نیئمگا گؤں وتی آدیمی کرد ریاستاں سیاسی، تجارتی و دود ربیدگی رشتگے جؤڑ کت کننت۔
کنفڈریشنء دگھ شرّیے اشنت کھ ریاستانء جدا بیگء راہ پچتر بیتنت۔ بزان مرکزی سرکارء اے ردا پھکا بیواک بیتنت۔ البت تاریخء تھا گیئشتر ھمے گندگ بیگا انت کھ کنفڈرل ملک جدا بیگء جاگھا گؤں یکا دگر نزیکتر شتگنت و فڈریشنش جؤڑ کتگ۔
ماں سے ملکاں بلوچستانء بھر بانکیء تچکین علاج مزنیں بلوچستانء آزادی انت، البت کنفڈریشن فڈرال لؤٹؤک و آزادی لؤٹؤکانء نیام یک پھلے بیت کنتنت۔ پھ بلوچ سیاسی جھدکارانء تپاکیء خاطرا دوئیں ٹؤلی ادا یکجاہ بیت کننت۔ بلے آزادی لؤٹؤکانء واستا اے کشکا پچ کنگء واستا ضروری انت کھ فڈرالزمء رندگری انگار کنگا چھ بندات بھ بیتنت۔
چھ مغربی بلوچستانا زرمبش و چھ مشرقیا بی ان ام چھ آ دگراں مناسبتریں ھؤربندنت کھ اے بنداتا کت کننت۔ اے دوئیں ھؤربند ماں ایران و پاکستانء تھا کنفڈریشنء گّپا گؤں ھؤر وت ماں وت ھم فرنٹے اڈ بھ کننت تا بلوچ راجء وت ماں وتی تپاکی وتی جاھا رودؤم کناں بھ بیتنت۔ يکا دگرا کمک کنگ و چھ یکا دگرء تجربھاں سوب زیراں ببنت۔
هیچ نظری موجود نیست:
ارسال یک نظر
وتی کلوا چێرا نبیس إت