یکشنبھء رؤچا بندات بیتگیں نشنل پارٹیء بنجاھی کمیٹیء دیوان دومی رؤچا ھم جاری منتگ، و دومی رؤچء دیوانا چھ پاکستان سرکارا لؤٹ کنگ کھ آ بلوچستانء ھند کوھلو و ڈیرہ بگٹی تھا وتی فوجی آپریشنا بند بھ کنت و جنگء سوبا چھ اؤدا درپھ در کتگیں بلوچ مھلوکا پدا بیاریت و آباد بکنت۔ سرکار درپھ در کتگیں اے مھلوکء ناماں ووٹ دیوکانء لڑا ھم باید ھؤر بھ کنت۔دیوانا اے ھم فیصلھ کتگ کھ چھ پاکستان سرکارء نیئمگا توار کتگیں 'آل پارٹی کانفرانسا' نشنل پارٹی بھر نھ زیریت۔ چیا کھ تمامین جمھوری واکان یوکا چھ پاکستانء سرکارا ترس ھستنت۔ گؤں سرکاریا کھ آ وت جمھوری واکانء دشمننت نندگ ھچ جمھوری ٹولییا زیب نھ دنت۔
دیوانا چھ سرکارا اختر مینگل و دگھ بلوچ بندیگاں ویل کنگء لؤٹ ھم کتگ۔ آھاں گشتگ کھ بلوچ جھدکارانء سرا جتگین سرجمین دروغین کیس دیر کنگ بھ بنت، گارکتگین بلوچ جھدکار درگيئجگ و آزاد کنگ بھ بنت۔ ھمے ڈؤلا 'میگا پروجکٹ"ء ناما بلوچستانا بنگیئج کتگیں بلوچ دشمن پندل انگار کنگ بھ بنت۔
نشنل پارٹی گؤں دگھ بلوچ سیاسی گلاں تپاکیے جؤڑینگء واستا یک گپ وترانی کمیٹی ھم ٹاھینتگ۔ اے کمیٹیء باسک ڈاکٹر حئی، میرحاصل بزنجو، جان محمد بلیدی، داکٹر عبدالمالک، سردارثناء اللھ زھری و ایوب جتک گشگ بیتکنت۔ آساپ 23 اکتوبر، 07
هیچ نظری موجود نیست:
ارسال یک نظر
وتی کلوا چێرا نبیس إت