گؤستگین باندات؛ مبارک قاضیاے عمرءَ، اے سندءَ
اے پیرین کسانیء دیرین گوزندءَ
وتی ستکگین سرزمینء ستم کشّین بی بی
پہ زندءَ
کہ نؤکی ترا کم و ناکاما پنچ سال بیت
چنچو بیگار کشّے
ھزار کار کشّے؛
اے عمرءَ، اے سندءَ
کہ لیبانی رؤچ انت
ترا بایدنت ژانگلوکے بداتین پتءَ
تئی اگہ مات بیران بیتگ؛
؛(خدا آدگہ کسترینان بہ رکـّآت)۔
دوپادانءاے رستریں زند جاہءَ
تئی نند جاہءَ
کہ انسان حیوان بیتگ
زبھریں ابیتکی یے تالان انت دیمء سرا تئي
دلء ملگزارین امیتانء گلبانگ ویران بیتگ
تئی پادانء بانداتء ھنّي مولورنت؛
تئی لنٹانء پن، چمء کنجل، گؤرء ھار و جیگی مولورنت
تئی ھار و جیگی کہ تئی واھگانء دلی دزگھارنت
شلین ارس گؤارنت
پہ تئی بے وسیءَ نمیرانیء موتک کارنت؛
اے عمرءَ، اے سندءَ
کہ روچتاکء عکسءَ ترا دارء پرّین سرے ماں سرءَ انت!۔
وتی سرزمینء ستمکشّین بی بی
تئی ملکء حاکم وتءَ ملکء حاکم گشنت
گار باتنت
جھان بنگرات؛
تو سلامت بباتے۔
بلوچ سوفٹء منّتا
هیچ نظری موجود نیست:
ارسال یک نظر
وتی کلوا چێرا نبیس إت