مغربی بلوچستان؛ سرکارء دستا دو درنجگ و سے کشگ بیت انت

چہ مغربی بلوچستانءَ حال شنگ بیتگنت کہ اؤدا بلوچکشیء بازار روچ در روچ گرمتر بیاننت۔ اے ردا 'بلوچء توار'ءَ چہ ایران 'ایسنا' حالرسینوکین بنجاہءَ نقل کتگ و نبیستگ کہ مروچي (؟) صحبا بخشوک شھلی بور نامین، نامی ئین فسادکارے ایرانشھر کشگ بیتگ۔ چہ اشیء گورا کلاشنکوف و تیر در آتکگنت۔

گوستگین شنبہء روچءَ (24 نومبر07) زاھدانء بندیگجاہ ءَ دو مردمان درنجگء حال 'خبرگزاری جمھوری اسلامی' شنگ کتگ۔ اے مردمان یکے شمس الدین گورگیج (بلوچ) بیتگ و آ دگہ محمود شاہ پشتون بیتگ۔ اے دوئینانء سرا مرگء سوداگر بیگء ( ڈرگ بھا کنگء) ڈوبہ جنگ بیتگ۔

ھمے روچءَ گون ایرانی واکان جنگا سے فسادکارء کشگ بیگء حال ھم اے حالرسینوکین بنجاہءَ شنگ کتگ۔ چہ اشان دو کس شمال شرقی کرمان کشگ بیتگنت۔ چہ اشانء گورا سلاح، یک موٹر سائیکل و یک دورگندے دستا کپتگ۔

یک دگہ مردے زاھدانء کش گورا سلاحبندین مردمانء سرا یورش برگء وھدا کشگ بیتگ۔ یکے چہ اشیء ھمراھان ٹپـّيگ ھم بیتگ۔ اے یورشءَ چار موٹر سائیکل و چيزے سلاح دستءَ آتکگنت۔ بلوچی نیوز رپورٹ