بلوچستانء مزاحمتی تحریکء دگہ استارے کپت

بلوچستانء مزاحمتی تحریکء سریں جھدکار بالاچ مریء شھید بیگء المّیں حال انت۔ بلوچ ورنا، جنگ نیوز و دگہ حالرسینوکین بنجاھان اے حال آتکگ۔ لھتے جاھان گشگ بیگا انت کہ بی ال اے وت اے حبرء راست بیگ منـّتگ۔

.

ڈان انلائنء حالء ردا بی ال اے بیورگ بلوچ حالکار سھیگ کتگنت کہ بالاچ مری دوشی کوھلو دمگءَ پاکستانی فوجء یورشےءَ شھید کنگ بیتگ۔ اے یورشءَ آئیءِ لھتے ھمراہ ھم شھید بیتگنت۔ بالاچ مریء کھولء مردم ھم چہ اے حبرا سھیگ انت۔ انگت چہ پاکستانء سرکاری مردمان کسےءَ اے درگتا ھچ نہ گشتگ۔ ڈان دیمتر نبیستگ کہ یک ملکی ٹلوژن چینلےءَ گشتگ کہ بالاچ مری افغانستانء تھا شھید کنگ بیتگ؛ پاکستانءَ انـّا۔

.

بی بی سی اردو حالء ردا (بالاچ مریء برات) گزین مری نیمگا حال شنگ بیتگ کہ افغانستانء خاکءَ میر بالاچء جنگ بیگء باروا جست پد بیگا انت۔ بی بی سی دیمترا نبیستگ؛ اے حال ھم ھستنت کہ بالاچ مری نوشکی دمگء ھند سرلچءَ گؤن پاکستانی واکان جنگا شھید بیتگ۔

.

نواب اکبر بگٹیء شھادتءَ چہ رند بلوچستانء مزاحمتی تحریکء مزنترین استار بالاچ مری منـّگ بیتگ۔ بالاچ مریء روگ پہ بلوچستانء آزادیء زرمبشءَ زنڈین تاوانے انت۔

بالاچ مری نواب خیربخش مریء شش بچان چہ یکے ات و خیربخش مریء مزاحمتی فکرءَ گون وتی کردءَ دیما بروکین مزنتریں جھدکارت۔ آ 17 جنوری 1965ءَ کوئٹہءَ ودی بیتگ۔ بنداتی وانگ آئی چہ گرامر اسکول کوئٹہ دربرتگ و پدا چہ روسء شھر ماسکوءَ سیول انجنیئرنگء ڈگری گپتگ۔ آ 2000ء گچینکاریان پہ بلوچستان اسمبلیء باسکیءَ سوبین بیتگت۔ گشگ بیت کہ سوگند ورگء درگتا آئی پاکستانء وفادار بیگء بدلا اسمبلیء توکا گوں بلوچستان وفاداریء جار پرّیتگت۔ چہ اشیء سوبا بازیں پاکستان پرست لاپسوچیگ بیتگ تنت۔ بی بی سی

بلوچی نیوز راجء اے روژنائیں استارء کپگا بلوچ راجء دیما وتی پدردیءَ درشان کنت۔