نواب بگٹیءِ کوشءِ پٹاسکاریءَ چہ میان استمانی بنجاھان کنگءِ لوٹ

اے گپ مدام گشگ بیتگ کہ پاکستانءِ سیاسی گلانءِ وت مان وتی جنگ پہ بلوچان فایدہ بنت۔ راستے انچو نہ، بلے بلوچ بے ھچ نہ بنت۔ اشیءِ اولی نشانی روچتاک انتخابءَ شنگ بیتگین رپورٹےءَ گندگ بیگا انت۔

بینظیر بٹوءِ کشگ بیگا و چہ آئيءِ سیاسی گلءِ نیمگا پہ بینظیرءِ کشوکانءِ درگیجگا پٹاسکاریءَ 'یو ان'ءِ مردمانءِ دستا کنائینگءِ لؤٹءَ سیاسی جیڑہ ودی کتگ انت۔ چہ اشان یک حبرے کہ مخالف ٹولی کنگا انت، بینظیرءِ وتی برات مرتضا بٹو کوشءِ باروا انت۔ مرتضا بٹو بینظیرءِ وزیر اعظمیءِ دورءَ کشگ بیتگ ات۔ پہ آئیءِ کشوکانءِ درگیجگا ھچ میان استمانی ٹولی توار کنگ نہ بیتگ ات۔

نین مخالف ٹولی گشگا انت وھدے پہ مرتضا بٹوءِ کشوکانءِ درگیجگا ھچ درملکی آرگ نہ بیتگ ات، گڈا پرچا پہ بینظیرءِ وتی کشگا چشین ضرورتے مارگ بیگا انت! پرے بحثءِ پروش دیگا نین پیپلز پارٹی لوٹ کنگا انت کہ نواب اکبر بگٹیءِ کوشءَ ھم درملکی بہ کن انت۔

بلوچ زان انت کہ پیپلز پارٹی بلوچانءِ دوستواہ نہ انت؛ آ یوکا مخالفانءِ حبرانءِ پروشگا اے لوٹا کنگا انت، بلے اشیءِ توکا بلوچانءِ سرا بیتگین زوراکیانءِ حالانءِ دیما آیگ بد نہ انت۔