خضدار جیلءِ سروک کشگ بیت، کوئٹہءَ دو بندیگ تتکگ انت

مشرقی بلوچستانءِ شھر خضدارءَ بندیگجاہءِ پٹان سروک شیرزمان ترین مروچی کشگ بیت۔ آئي جمعہءِ نمازءَ چہ رند وتی ڈرائورءِ ھمراھیءَ گوزگا بیتگ کہ موٹر سائکل سواران آئیءِ سرا تیرگواری کتگ۔ اشیءِ سوبا آ سک ٹپیگ بیتگ و نادراہ جاہءَ برتگ اش کہ اودا ساہ ئی داتگ۔ اے حملہءَ ڈرائورءَ گـــرز نہ بیتگ۔

چہ کوئٹہ حال انت کہ مروچی صحبا چہ اودءِ یک جیلےءَ دو نامدارین دھشت گرد تتکگ انت۔ اشانءِ نام عثمان سیف اللہ کرد و شفیق الرحمان رند ظاھر کنگ بیتگ انت۔

پولیس افسر محمد اکبرءَ حالکار گشتگ انت کہ صحبا بندیگان حساب کنگءِ وھدا آ سرپد بیتگ انت کہ اے دوئین کس گار انت۔ چہ جیلءِ پھکین افسران اے ردا جست پرس بیگا انت۔

چہ بندیگان سیف اللہ کرد عمر قیدءِ سزا دیگ بیتگ و شفیق رندءِ کیس انگت کورٹءَ بیتگ۔ سیف اللہ رندءِ دست شیعہ-سنی فرقھی جنگان ھور بیتگ۔ بی بی سی اردو