جمھوری وطن پارٹیءِ بنجاھی منشی واجہ عبدالقادر قلندرانی گشتگ کہ جنگءِ سوبا چہ ڈیرہ بگٹی و کوھلو در په در بیتگین مردم أنگت پچین آسمانءِ چيرا بے کسیءَ زند گوازینگا أنت۔آئی گشتگ کہ چہ نام گپتگین ھـَندان نزیک یکصد و پنجاہ ھزار مردم ھستین جنگءِ سوبا درپہ دریءَ مجبور بیتگ أنت و إے مردم آتکگ مشرقی بلوچستان و سند صوبہءِ لهتے ھندان گؤن بزگی زند گوازینگا أنت۔ پاکستان إشان وت کمک نہ کنگا إنت و دگران هم پہ کمک کنگا نہ إلـّيت۔
إے ردا میڈیاءِ بیتواریءِ درگتا واجہ عبدالقادر قلندرانی گشتگ؛ چہ سرکاری واکانءِ ترسءَ پرنٹ و الیٹرانک میڈیاءَ وتی چم بستگ أنت۔ ألبت ھمے میڈیاهانءِ سروک پہ وتی نامءِ مزن کنگا لبنانءِ وڑین جنگ زدگین ھندان ترتاب کن أنت و دنیاءَ چہ اودءِ مھلوکءِ مشکلان سھیگ کن أنت۔
آئی پاکستانءِ واکدار، ان جی اوز و میڈیاءِ باروا وتی خیال إے ڈول گیشـّینتگ أنت؛ إشان بلوچستانءِ مال پـُـلگ و ورگا دوست بنت، بلے إدءِ مردمانءِ مُشکِلانءِ نیمگا دلگوش گؤر کنگءِ بدلا چيئر لـُنٹان وتی گـَلی و شادِھیان درشان کن أنت۔
چہ درستان دردناکترین گپ کہ واجہ قلندرانی پَدّرکتگ إش إنت کہ وتا راجپھاز گـُشوکین بلوچ گل و ھوربند ھم پہ وتی بلوچدوستیءِ پیش دارگا إے نیمگا وتی چمان شانک دیگا شات نہ کنگا أنت۔ آساپ
هیچ نظری موجود نیست:
ارسال یک نظر
وتی کلوا چێرا نبیس إت