مغربی بلوچستانءِ لھتے نوکترین حال

ایرانء دستا دگہ شش بلوچان رکـّينگء دستبندی

.

راڈیو بلوچی-سویڈنءَ وتی شنگ کتگین حالےءَ ترس ظاھر کتگ کہ پیری –دوشنبہءَ زاھدانءِ کورٹءِ دیما پیش کتگین شش بلوچ جوان درنجگ بنت۔ إے ترسءِ بنرد ایرانی واکانءِ کتگین پیسری ھنچین کارانءِ سرا إیر انت۔ اے ششین مردمانءِ سرا جنداللہءِ باسک یا پہ إے ٹولیءَ کار کنگءِ ڈوبہ جنگ بیتگ۔

راڈیو بلوچیءَ چہ انسانی حقانءِ ھوربند و ٹولیان دستبندی کتگ کہ پہ اشانءِ رکـّینگا رسگا گام چست بہ کن انت۔ راڈیو بلوچی

مغربی بلوچستانءِ سیاسی گلانءِ سُست رواجیءِ سوب انت کہ راڈیو بلوچیءِ مردمانءِ ڈولین بلوچ فرد و شخصیت چہ اِشان پیشگامتر انت، و پہ وھد مردمان ڈاہ دَے انت۔

زاھدانءِ کورٹءِ دیما پیش کتگین بلوچ جنداللہءِ باسک نہ انت؛ جنداللہ

جنداللہءِ بیانے اوارین بلوچ ویبسائٹان شنگ بیتگ و گشگ بیتگ کہ زاھدانءِ کورٹءِ دیما پیش کتگین مردمانءِ سرا جنداللہءِ باسک بیگءِ جتگین ڈوبہ بے بُنین انت و إے مردم ھیچبر جنداللہءِ باسک نہ بیتگ انت؛ نیکہ ھچ ڈولین ھورکاری ئے اشان گون جنداللہ کتگ۔

البت جنداللہءَ ایرانءِ سرکار بیمتراپ داتگ کہ چہ بلوچ کشیءَ وتی دستءَ بہ کشـّیت، اگہ نہ جنداللہ اشانءِ بیڑءِ گرگا ترندین گام چست کنت۔ تفتان

بلوچ گل و ٹولیان گون نوروےءِ پارلمنٹءِ کماشءَ گندگ کتگ

ھفتگے پیسر بلوچ گل و ٹولیان گون ناروےءِ پارلمنٹءِ کماش واجہ 'توربیورن یاگلاند' گندگ کتگ و آئي اش چہ بلوچستانءِ جاوران سرپد کتگ۔

لھتے چہ نقطہ کہ بلوچستانءِ باروا واجہ توربیورن یاگلاندءِ دیما آرگ بیتگ انت اش انت:
پہ دنیا و آ دمگا بلوچستانءِ جغرافیائی اھمیت؛ بلوچستانءِ راجی جھدءِ تاریخ سرا گونڈین چمشانکے؛ بلوچستانءِ توکا ایرانی واکانءِ دستا انسانی حقانءِ لگتمالی؛ بلوچ مھلوکءِ سنی بیگءِ سوبا آيانءِ خلافا فرقگزاری؛ بے بنین بھتانانءِ سرا بے حسابءَ مردمان درنجگ و پنچ کسانءِ دستے و پادے برگ؛ پہ بلوچان وانگ وزانگءِ راھان شنک جنگ؛ پہ بلوچانءِ مردمی آبادیءِ کم کنگا درینان آرگ و بلوچسانءِ نندارینگ. زرمبش