یورپءِ شمال و مغربی ملکان چوکہ ناروے، سویڈن، ڈنمارک، ھالنڈ و برطانیا بازین بلوچانءِ سر کپتگ و گيئشترینان إے ملکانءِ توکا 20 سال یا چہ إشی دراجترین دَورے گوازینتگ۔ إشانءِ چک نین رستگ و مان آتکگ أنت، ألکاپین کار و ذمہ داریانءِ سرا أنت۔ چہ إے ملکان یوکا ناروے إنت یا کم و گيئش سویڈن بلوچ أنت کہ چہ اودا بلوچی زیمل و کلچری دیوانان بران برانا برجاہ دارگ و وتی کمیونٹیءِ توکا بلوچ راجی مارشتا زندگــتر کنگءِ حالان ما إشکن إنت۔ إے اودءِ بلوچانءِ بھتاوری إنت کہ آھانءِ نیاما بلوچی زیملکار واجہ عبدالرحمان، وشتوارین گشندہ واجہ رستم، سعید و زبیر موجود أنت۔
منا حال رستگ أت کہ شنبہ 2 فروریءَ اوسلوءِ بلوچ کمیونٹی یک زیملی دیوانے گنگا إنت۔ گڑا دلءَ واھگ کت کہ بہ روان و بچاران بارین إے حالان کہ ما مدام إشکن إنت، إشانءِ پشتءَ راستی چے إنت۔
وھدے من بالی پٹءَ سر بیتان کہ بالی گراب سوار بہ بان و بہ روان گڑا منا بالیگراب کمپنیءِ مردمان حال دات کہ ناورےءَ سک باز برف رتکگ چمشکا بازین گراب نہ روگا أنت. إے حالءِ إشکنگا أولءَ وا من دلاپ بیتان کہ چؤ مہ بیت گراب پہ بیھا مہ روت و من چہ إے دیوانءَ زبھر بہ بان! ألبت رندترا منا حال إش دات کہ پہ اُمید 4 کلاکءَ رند گراب إدا سر بہ بیت و پدا در بہ کپیت دیم په اُسلو به روت۔
من چار و نیم کلاکءَ رند گرابا سوار بیتان و اودا بیگاہءِ رستان. چه إرپورٹءَ من و واجہ إحسان تچکا زیملی پروگرامءِ جاگہءَ شت إنت۔ پروگرام ھمش أت نوکی بنگیج بیتگ أت و ورنائین جارچین گون پھک و پلگارین بلوچیءَ نندوکان بلوچستانءِ باروا سرپدی دیگا تنت۔ چہ إشی رند واجہ عبدالرحمان گون بنجوءَ و واجہ غفور گون تنبورگءَ پیش کنزت أنت و پہ دیوانءَ یک وشین زیملے جت إش۔ ألبت مہ شموشان کہ ڈکــّرءَ إدا ھم بلوچی زیملی سَرءِ آجـِنـَگ أنگار نہ کتگ أت و یک درامدےءِ خدمات په إے کارءَ زیرگ بیتگ تنت۔ چہ إشی رند یک ورنائےءَ گون وتی وشین گٹءَ و نام گپتگین زیملکارانءِ کمکا یک وشین لیکوئے اوکل کت۔ إے لیکوءَ منا یک تھتالےءَ دور دات و من إنچوک ھم ترانگ نہ کپتان کہ إے وشتوارءِ نامءَ جاھے یاد داشت بہ کنان۔
إے ھم بہ گشان کہ بازین کسان چہ زیملءِ بندات بیگا پیسر گپڑے شعر ونت أنت۔ منا موہ نہ رس إت کہ پھکانءِ نامان جاھے نبشتہ بہ کنان۔ بلے واجہ زبیر و و اجہ غفور ھمشانءِ توکا ھور تنت۔
رندا آتک واجہ زبیر کہ زیملءِ ھمراھیءَ جی آرءِ نام مان سارتین برفانءِ چیرا برجم داشتگین گرمین دیوانءَ أنگت بزرتر بہ بارت و آئيءِ نبشتہ کتگین شعر
"او کپوت بالی لیاریءَ گور کن
لیاریءِ ورنایان سلام سرکن"
گون وتی وشین توارءَ اوکل کت۔ چہ اشی رند وھدے زبیر
" او قافلہ والا منی أحوالان بہ بر گون
بلکین من نہ مرتان تئی گندگا کایان"
اوکل کت گڑا گون من ھور ألــّما دگہ بازین کس وتی ماتین وطنءِ ترانگا کپت أنت. پدا درامد و بدواھانءِ پادانءِ چيئرا اودءِ زید و ندارگانءِ لگتمالیانءِ دردان چہ چمان أرس شلان بیت أنت۔ وھدے کہ من وتی چمانءِ أرس پھک کت أنت گڑا ترانگ کپتان کہ إے ھما زبیر إنت کہ مان پالتاکءَ مدام شعر برے دپگال کنت و برے اوکل۔ ألبت زیملءِ ھور بیگ و شرین ساؤنڈ سیسٹمءَ واجہءِ توارءِ شیرکنی باز ھمنچوک گيئشتر کتگ أت۔
إے دیوانءِ توکا منا چہ ھر چيزءَ گيئش إے حبرءَ شاد کت کہ إنتظام پھک نوکین نسلءِ دستا أت۔ إے ھما نسل إنت کہ یورپءَ رُستگ کہ چہ ھمشان بازین ھمدا ودی ھم بیتگ أنت۔ ھمے ردا وھدے من وتی وشی اودءِ لھتے واجھانءِ دیما ظاھر کت، گڑا آيان منا گشت کہ نین اودءِ أنجمنءِ تمامین ذمہ ھمے نوجوانان وتی چکـّا زرتگ انت؛ کماش بس پہ ووٹءِ دیگا رَو أنت یا یوکا ھنچین مراگشان بھر زیر أنت۔ رپورٹ ولید گربنی پہ بلوچی نیوز
هیچ نظری موجود نیست:
ارسال یک نظر
وتی کلوا چێرا نبیس إت