روچتاک آساپء سبکـّي - بی اس او -محی الدینءَ دو گشگء بدلا بی اس اوءَ چار کنگ

بلوچی نیوز بران برانا وانوکان ترانگ ديگا بیتگ کہ روچتاک آساپ بی اِن پی- مینگلء مقصدان دیما برگا اِنت و پرے مقصدء پیلو کنگا سیاہءَ اِسپیت گشگ و اِسپیتءَ سیاہ کنگا چہ ھم چک پد نہ بیت۔ اِشی شرین کارے یا بدین، فیصلہءَ وانوک وت کن اَنت، اَلبت پرے پارٹیء پاشکانء چیئر دیگا بلوچ جھدء دگہ بھران تاوان دیگ اَلـّما اِیر جنگ لوٹ اَنت۔

پہ وتی پارٹیء واھگانء پیلو کنگا مینگل پارٹیء 'دزبوگین' بی اِس او- محی الدینء دو ٹکـّر بیگء پاشکا ھم چیئر دیگء جھدا روچتاک آساپءَ بی اس اوء آ دگہ ٹولی ڈوبارگانء توکا ھور تـّرینتگ اَنت۔ اَفسوز کہ ھمنچوک ھم ترانگا نہ کپتگ کہ ھمے محی الدین و گلزار بلوچ تنت کہ اِشان داکٹر اِمداد و بشیر زیبء سرجمین جھد کہ آوان پہ بی اِس اوء تپاکیءَ کشـّتگ تنت؛ پادلپاش کت اَنت و وتی مینگل پارٹیء دزبوگی اَنگار نہ کت۔

نین کہ اِے مفادپرستانء سیتان چہ یکا دگرا خطراِنت و آ گٹ گیر اَنت؛ روچتاک آساپ اِے راستیءَ اِیمانداری سرا شنگ کنگء بدلا نبیستگ:
۔۔۔ زی 4 جولائی 2008 بلوچ طلبا تنظیم بی اِس اوء چارمی ٹکـّر اَڈ کنگ بیت۔ اِے نوکین ٹکـّرء سروکیءَ جناب گلزار بلوچ کنت۔ مہ شموش اِت کہ چدا پیسر بی اِس اوء 3 ٹکـّر ھست انت۔۔۔

اَگر آساپء اسٹاپ رپورٹرء توکا تشے اِیمانداری بہ بیتین اَت و چہ بی اِن پی مینگلء کاسگ چٹـّيءَ آ دیمتر فکر ئي بہ کتین اَت، گڈا آئي سرکچ وارتگ اَت کہ اِے رپورٹء سیت بلوچ راجءَ یا راجی حرکتا نہ رسیت۔

بی اِس او -محی الدین گروپء دو ٹکـّر بیگء تچکین رپورٹ بلوچی نیوزء پیسرا چو سرجم کتگ و شنگ کتگ. مینگل پارٹیءِ دزبوگین بی إس او -محی الدین دو ٹکـّر۔ چیرمن محی الدین پہ گورے و سکریٹری جنرل گلزار بلوچ پہ دیمے۔ دوئین چوکہ جاہ کیئت پہ تنظیمءِ سروکیءِ ذمہ داریان جیڑگا أنت۔