کلوے پہ نشنل پارٹیءِ بنجاھی کمیٹی

بلوچستانءِ سرا بیتگین ظلم و زوراکیانءِ داستان دراج اِنت، بلے چہ جون 2004 دیم پہ اِنگو بلوچستانءِ سرا مشرفءِ بُندات کـُتگین فوج کـَشیءِ سببا بلوچانءِ زندگی مان آوانءِ وتی لوگ و سرڈگارءَ چوکہ جھنمءَ اِنت۔ یے دورانا صدانءِ حسابا بلوچ زھگ، جنین آدم، جوان و کماش شھید کنگ و ھزاران کس بے لوگ یا درانڈیہ بیتگ اَنت. و دگہ بازینے اَنگت مان چيئرین بندیگجاھان سرکاری لٹــّانءِ دیمپان اَنت۔

چہ یے پھکین راستیان سرجمین دنیا سھیگ اِنت۔ و دنیاءِ سھیگ بیگ برکتِ بلوچ جھدکاران اِنت۔ چیاکہ آوان بازین سیمنار، جلسہ، پریس کانفرنس و گون دنیاءِ سفارتکار و سیاستکاران گند گدار کتگ۔ ھمے جھدکارانءِ توکا نشنل پارٹیءِ لھتے سَرین باسک گندگ بیتگ اَنت، بلے وتی نِزورین لیڈرشپءِ سببا بلوچءِ توارا چست کنوکین یے باسک وتی پارٹیءَ چہ بلوچ عوامءِ ڈوبارگان رکـّينگا بے سوب بیتگ اَنت۔ پدا؛ نشنل پارٹی مان جھدءِ آدگہ تکان ضروری کردءِ اَدا کنگا گندگ نہ بیتگ۔

نین کہ پارٹیءِ مرکزی کونسل سیشن چه اِنچو سالان رند بیگا اِنت، باسکانءِ ذمہ داری اِنت کہ آ پہ وت یک ھنچین نوکین لیڈرشپے چہ وتی نیاما در بہ چن اَنت کہ آئی گون ھنوگین جاوران ھمدپین جھدے دیما برگا مہ ترسیت۔ پچیاکہ اگر نشنل پارٹی کہ بلوچستانءِ یک مزنین سیاسی واکےءِ واھند اِنت؛ پہ راجی حقان گون دلیری و ثابت قدمی پیش بہ کنزیت گڈا بلوچ راجءِ سفر دیم پہ منزلءَ لـُک تر بیت اِنت۔ بلوچی نیوز ٹیم