پھل کن اِت، بلے ھرچے کہ زانان آوان گشان

برے برے مردمءِ دل گشیت کہ ھچ مہ گش؛ بل مردمان وتی ڈولا کار کن اَنت۔ اگر شرتر کار کنگءِ توان بہ بیت گڈا وت پیئش بہ کنزان۔ پدا خیال کئیت کہ بلوچ جھدکار کموک اَنت و ھمے کموکین جاھے دوستیءِ بندوک اَنت، جاھے سیادیئے و جاھے ھمشھریئے۔ پمشکا بلوچءِ سیاست چہ فکری ردوم زبھر اِنت۔ کارکنوکانءِ کمّی اِنت۔ یے سببا گشگ ضروری اِنت. البت منی گشگا کس دلا میاریت، اشی مقصد یک دست بندی انت که بلوچ تشے شرتر خیال گوئر به کن اَنت۔

حبر چہ ادا چست بیت کہ زی بزان 8 آگست 2008 مئے راجءِ یک شرّین جھدکارےءَ - شاید بلوچ سیاسی گلان‏ءِ بے تواری و کاھلیان مارگا چہ رند -جار پرّینتگ کہ آ مان سویڈن شھید مھرنھاد و گون آئی ھور شھید کتگین عبدالناصرءِ یادا پرسی دیوانے داریت۔

نین ھمے جار کہ آئی وت نبیستگ، یک و دو ردی ھمشیءِ نبیسگءِ توکا آتکگ اَنت۔ ظاهر اِنت که نبشتانکان چه ردیان گیشینگ مشکل إنت بلے وهدے ھمے نبشتانک چار کسانءِ دیما گون ھمے ردیءَ بہ گوزیت گڈا بزان اِدا مشکلے ھست۔ یے جار بلوچانء بازین ویبسائٹان گون ھمے ردیان شنگ بیتگ۔

گشگء مقصد اِنت کہ اِنچو ویبسائٹ بلوچان ھست اَنت، یے پہ بازین کسان بلوچانءِ باروا ریفرنس اَنت۔ بزان کسے بلوچانءِ باروا چیزے شوھاز بہ کنت، آئیءِ اولی شوھازءِ جاگہ ھمے بلوچانءِ ویبسائٹ بنت۔ بلے اگر اِدا ما چیزان چپ چؤٹ و پشت دیم بہ کن اِنت گڈا مردمان‏ءِ داتگین ریفرنس ھم بے مانا بنت۔

نوکی 5 روچ اِنت کہ مھرنھاد شھید کنگ بیتگ۔ ما چہ ھنـّيگا آئیءِ شھیدیءِ روچ و عمرءَ بہ شموش اِنت گڈا آیوکین نسل چے ڈولا ترانگ دیگ بیت کن اَنت کہ مھرنھاد کجا مقصدانءِ پیلو کنگا وتی نؤک گلگین جان ندر کت!