مغربی بلوچستانءِ مردمانءِ سرا چہ آوانءِ مغربی براتان کمتر ظلم و زوراکی نہ بیگا اِنت۔ اگر بمبگواری و دیم په دیمی جنگءِ پڑا مردمانءِ کشگ بیگءِ حبر بہ بیت الـّما پاکستانی فوجءَ گيئشتر بلوچ وتی تیر و توپانءِ دپا داتگ۔ البت اودا کہ دستگیر کنگ و درنجگءِ گپ بہ بیت؛ ایرانی واکان پھکین سیمسر گوازینتگ اَنت۔ ایرانءِ دستا تیرانءِ آماچ کتگین و درتکگین نامانءِ لڑ دراج اِنت و ھر یک کـُشتگینءَ وتا دردناکین داستانے ھست اِنت، بلے چہ پھکان گيئشتر شھید مھرنھادءِ باروا نبیسگ بیتگ و مھرنھادءِ داستان پہ بلوچ راجءِ پھکین تکان چؤکہ ھما مشعل اِنت کہ تھاروکیان راجی جھدکاران راھشونی کنت۔
مردم پہ درد بیت وھدے گندیت کہ مھرنھادءِ ناما انچوکین مزنین و تاریخ سازین بلوچ ھستییے سالے و سئے ماہ ایرانی واکانءِ لٹ کٹـّانءِ دیمپان و پدا شھید کنگ بیت؛ پہ مشرقی بلوچستانءِ راجدوستین گلان بے اھمیت گـُوَست۔ یکے چہ آوان مظاھروے نہ کت، حالتاکان بیانے نہ دات و ایران ایئر نہ جت!
یعقوب مھرنھاد نہ یوکا مان بلوچانءِ تاریخءَ گون وتی زگرین خونان رھشونیءِ بے درورین کشکے رَست و شـُت؛ آئی مان سرجمین انسانی تاریخءَ وتی مٹ وت بیت۔ چیاکہ آ اولی و یوکین ویبلاگ نبیسوک اَت کہ آئیءِ وتی شنگ کتگین جھدءِ داستان و مارشت آئیءِ خلافا شاھدیءِ بدلا کارمرز کنگ بیتگ اَنت و ایرانی واک و سنـّی ملا آسرگریءَ سر بیت اَنت کہ مھرنھاد یک سکیولر بلوچ راجدوستے اِنت، چمشکا پہ شیعہ و سنی دوئین ملاوان زنڈین خطرے اِنت؛ کشگ بہ بیت۔
مان مغربی بلوچستانءَ جھد کنوکین آ دگہ گل و ٹولیانءِ داستان مئے دیما اَنت، بلے ضروری اِنت کہ مشرقی بلوچستانءِ سیاستکار مھرنھادءِ باروا گيئشتر بہ وان اَنت و آئیا شرتر سرکچ بہ ور اَنت۔ مھرنھاد ھما بلوچ اِنت کہ بیست یکمی قرنءَ چہ ھر بلوچءَ گيئشتر آئیءِ باروا نبیسگ بیتگ۔ اَگر کسے شوھاز بہ کنت آئیءِ باروا حال، تبصرہ و چمشانک بے حسابا دستا کپیت۔ آئیءِ جھدءِ مثال گشتانکانءِ اثران گيئشتر، نبشتانکان عِلمی تر و دیوانان ڈولدارتر کن اَنت۔
هیچ نظری موجود نیست:
ارسال یک نظر
وتی کلوا چێرا نبیس إت