پاکستانءِ واکدارین سیاسی گلءِ نیمگا آصف زرداری صدارتءِ امیدوار

پاکستانءِ مزنترین پارٹی کہ ھنون ملکءِ واکداری ھم ھمے پارٹیءَ گوئر اِنت، فیصلہ کتگ کہ پارٹیءِ همبلین سروک آصف علی زرداریءَ پاکستانءِ صدارتءِ ووٹان امیدوار بہ اوشتارینتیت۔ یے فیصلہ گلءِ بنجاھی باسکان مان وتی یک دیوانےءَ کتگ۔

آصف علی زرداریءِ پھتوین سیاستءِ برکتا مشرف مجبور بیت کہ چہ صدریءِ ذمواریان دست بہ کشـّیت۔ ھنـّوگین کشّ چیلانءِ توکا یوکا آصف علی زرداریءِ ڈولینےءَ واک ھست اِنت کہ پاکستانءَ چہ شکونیءِ سیاھین گپچلءَ در بہ کنت۔ و امید ظاھر کنگ بیگا اِنت کہ آصف زرداری ووٹان سوبین بیت اِنت۔ پہ صدرءِ عھدوا 6 ستمبر گچینکاری بنت۔

خیال انت کہ پاکستان پیپلز پارٹی و پاکستان مسلم لیگ -نوازءِ نیاما فیصلہ بیتگ کہ آصف علی زرداریءَ صدر کن اَنت و چہ آئی رند اسلام آبادءِ سیٹءَ کہ نواز شریف ووٹان بھر زیرگی بیتگ و اودا گچینکاری مھتل کنگ بیتگ اَنت؛ نواز شریف اوشتیت و سوبینیءَ چہ رند گیلانیءِ بدلا پاکستانء وزیر اعظم جؤڑ کنگ بیت اِنت۔ بلوچی نیوز