بلوچستان اسمبلیءِ دروازگا جنین آدمان چؤڑی بست

مروچی بزان چارشنبہ 17 ستمبر 2008ءَ 'بلوچ خواتین پئنل'ءِ جنین آدمان ھزار گنجی میئتگءِ سرا فوجیانءِ یورش و یک جنین آدمے شھید، بازین کسان ٹپّيگ و چار کسان دستگیر کنگءِ خلافا مان کوئٹہ یک مظاھروے کت۔ یے مظاھرہءِ مردمان بلوچ راجی آزادیءِ پلانگریا نعرہ جنان کت و بلوچستان اسمبلیءِ دیئما سر بیت اَنت۔ اؤدا جنین آدمان اسمبلیءِ دروازگءِ چکّا پہ بلوچ وزیراعلا، بلوچ گؤرنر و بلوچ اسمبلی باسکان یک یک جُتکے چؤڑیگ بَست۔

ھوریا بلوچستانءِ سبز، سُھر و نیل رنگانءِ بئرک اسمبلیءِ دروازگءِ سرا ظاھری دیوکان ٹال کت۔

خواتین پئنلءِ سروکین جنین آدمئیا گؤن بی بی سی وتی گپان گشت: مارا گشگ بیگا اِنت کہ شمئے گورنر بلوچے، وزیر اعلا بلوچے؛ تا ادا مارا گشگ بیگا اِنت کہ ملکءِ صدر زرداری بلوچے اِنت۔ ما لؤٹ اِنت بہ گش اِنت کہ اگر آ بلوچ لؤگان ودی بیتگ اَنت، پہ ما ھچ فرق نہ کنت۔ چیاکہ آوانءِ واکداریءِ وھدا بلوچ جنین آدم وتی لؤگانءِ تها ایئمن نہ اَنت۔ ما چمشکا ادا (پہ آوان اسمبلی ماڑیءِ دروازگءِ دپا) چؤڑی بستگ۔

بی بی سی رپورٹرءِ گشگءِ پدا ظاھری دیوکان گشتگ کہ ھنّوگین سرکار چہ پیئسریگا ھچ فرق نہ کنت۔ ھما ڈئول بلوچانءِ سرا یورش برگ بیگا اَنت۔

آنگو کراچیءِ لیاری ھندا بلوچی رپلکن پارٹیءِ سلیم افشانی نامین جھدکارےءِ ٹپ ٹؤرین لاش مان یک گؤنییے بند دستا کپتگ۔ آئیءِ ھؤرین جھدکار شیر محمد بلوچ گشتگ کہ سلیم چہ وتی لؤگا پیئشی رؤچا در کپتگ و گشتگ ئی کہ سنگتےءِ چارگا روگا اِنت۔

لھتے بلوچانءِ خیال اِنت کہ بلوچ سرمچارانءِ جنگ بندیءِ سببا پاکستانءِ بازین چیئرین دست بژنیگ اَنت و جھدا اَنت کہ وڑے نہ وڑے بلوچان دیئم په جنگا سُکین بہ دے اَنت۔ یک نیئمگے مان کراچی سلیم کاشانی و ھزار کنجیءَ بانک گلناز مریءِ کشگ بیگءِ سرا مردم سک پہ درد اَنت، بلے آدگہ نیئمگا بلوچ سرمچارانءِ اؤپارا باز ستا رسگا اِنت و ھمے امید ظاھر کنگ بیگا اِنت کہ سرمچار پدا تپنگان بئید چہ سیاسی جھدکارانءِ سوجا چست نہ کن اَنت۔ بلوچی حال

بلوچ خواتین پئنلءِ ویڈیو ادا چارگ بیت کنت------->>>