روچ ٹکّی بلوچستانءَ گوئزوکین شصت سالان وھد وھدءِ سرا حاکمان آسگواری کرتگ۔ نؤکین آسگواریءَ دو و نیئم سال بیت کہ برجاہ اِنت۔ مری وبگٹی دمگ یے رندی سرکارءِ غضب و زؤراکیءِ آماچ اَنت۔فوجی آپریشن زؤراک اِنت و بلوچ سرمچار پہ وتی ڈیہ، و ننگءِ ساٹگا گؤن ریاستءِ درستین طاقتا دیم پہ دیم انت۔ پاکستانءِ حاکم گش اَنت کہ مان بلوچستان تا ھما وھدا آپریشن برجاہ مانیت تا کہ یک مردمے بلوچستانءَ وت واجھیءِ وابا گندیت۔ آ دگہ نیمگا بلوچ سرمچار و آوانءِ سرؤک نوابزادہ براھمدغ بگٹی گشیت کہ یے جنگ تناوھدی برجاہ دارگ بیت کہ دری زؤراکین راج چہ مئے سرزمینءَ در نیا اَنت۔ حاکم گش اَنت کہ آوان ڈیرہ بگٹی و مری دمگان پہ راجی مڈیانءِ حفاظتا فوج دیئم داتگ۔ نوابزادہ براھمدغ گشیت کہ یورش آرؤک دوزّ اَنت، راجی مڈی مئے وتی بلوچ راجءِ مڈی اَنت۔ اینکس وھد چہ مئے بے اِتفاقی و نابودیءَ درامدان دوزتگ برتگ أنت۔ نون راجءَ سما کرتگ و وتی ڈیرہ بگٹی، سوئی، کوھستان مری و آ دگہ درستین بلوچستانءِ مڈیان پھازیت۔ یے کجا حبر اِنت کہ درامد پہ زؤر به یئت منی جندءِ لؤگءِ تھا و منا به جنت، پدا منا ناشربه گشیت؟ اصلی ناشر ھما اِنت کہ دگرءِ گسءِ سرا یورش ئی بُرتگ۔
بلوچ دنیاءِ اولیءِ راج نہ اِنت کہ آئیءِ ڈگار پہ زؤر آوار جنگ بیتگ۔ نے بلوچ اولی راج اِنت کہ پہ زؤر و زؤراکی، مسئلہ و پندل ئیردست و غلام کنگ بوتگ۔ بلے ھر ھما راجءَ کہ پہ دل آجوئی ئی لؤٹتگ، آئی غلامیءِ توک لکؤشتگ و وتا آزاد کنگا سؤبین بیتگ۔
یے رندیین جنگ کہ برجاہ اِنت و آئیءِ سروکی ورنایین براھمدغ بگٹی کنگا اِنت؛ لس بلوچ مخلوقءِ تھا باز تیزیءَ رؤتگ جنان اِنت و ھموک بلوچ آئیا وتی جھد منّيت۔ البت بلوچ راجپھازین سرؤکانءِ کرد ھچ وڑا توسیپ دیگا نہ اَرزیت۔ خاص چشین روچان کہ نون جنگءِ تھا شدت و سکّی آتکگ۔ ڈیرہ بگٹی و کوھستان مریءِ لس مخلوق؛ پھوال و شوانگانءِ گدان و جؤھان سوچگ بوئگا اَنت۔ گوئنڈوکین زھگانءِ سرا پس و ماسانءِ دیما تیرگوارین اَنت۔ ھمے وڑین گوئنڈین زھگ و جنین آدمانءِ دیما آوانءِ پس، براس و سیالان تیرانءِ آماچ کن اَنت تا آ زندگ اَنت چشین سزاوا چہ دلان در کت مه کن اَنت۔ مردمانءِ لاش چنکس روچ قھارین گرماگا ڈنء ِ سرا کپتگ اَنت۔ ھچ یک مسلمانےءَ روگ و ھمے لاشان مسلمانانءِ وڑا کفن و گؤر کنگا نہ ھلّ اِنت۔ تیوگین بلوچسان چؤ لوھیءَ لھڑ جنت۔
چہ بلوچستانءَ ڈن مان عرب ملک، یورپ، کنئڈا، امریکا و آسٹرالیا نندؤکین بلوچ وت سرا وت چندہ و پوری کنان پہ وتی وار و بزّگین راجءِ بے وسین مردمان کمک راہ دیگا تک تاچا اَنت۔ بلے ملکءِ تھا نندؤکین مزن مزنین سرؤک کہ ھمے راجءِ دوستیءِ ناما مدام چہ ھمشان ووٹش گپتگ و انگت وتا مزنین راج دوست گش اَنت؛ چؤ مُردگا بے توار اَنت۔تا ھمنچوک دیر کہ چم کار کن اَنت، مری کوھستگ و ڈیرہ بگٹیءِ بازین دمگان آس رؤک اِنت۔ لنگڑ و بے نامین بلوچانءِ گدانان سؤچگا اَنت، جؤھانش گؤن کاہ و کدیمان بن دیگ بوتگ اَنت، سرکاری فوجا آوانءِ مال دیم پہ وت بُرتگ اَنت۔ بازین غیرتی براس کشگ بوتگ اَنت و دگہ بازینےءِ لاش رؤچءَ سرا کتگ اَنت۔ آدگہ ٹپّی اَنت و گون خون ھُلوکّین ٹپان نِھـِرّ دَيَگ بیگا اَنت۔ آوانءِ دپ پچین ٹپّان درمان کنگءِ بدلا پُر و جَس مان کنگ بیگا اِنت۔ گونڈؤکین زھگ چنکہ رؤچءِ گژنگیءَ پـِلِکّ اَنت۔ یے وڑین سکّین ساھتان بلوچستانءِ بازین راجدوستین گل چوش کہ جمھوری وطن پارٹی، نشنل پارٹی و بی ان پی مینگلءِ نِندگ و ندارگ چارگا ھچ سر پرء نہ کنت۔
یے وڑین پارٹی گش اَنت کہ آ سرمچارانءِ کمکا کوہ پہ کوھین نه بنت چیا کہ آ جمھوری جھد کن اَنت، بلے دنیا گندگا اِنت کہ یے دوستانءِ شھری و جمھوری جھد ھم یَوکا تا اخباری بیانان اِنت۔ دنیا زانت اِنت کہ آوانءِ اخباری بیان یے سکّین ساھتا پہ گوئنڈین زھگےءَ گلاسے سارتین آپ ھم نہ بیت، ٹکّر ٹکّرین براسانءِ دردانءِ تھرینگ وتی جاھا۔العین و دبئیءِ 'بیلچہ' جنؤکین زحمت کشانءِ سرجم کتگین دوئین درھم یا ریال سر بیت اَنت، بلے ملکءِ تؤکی مزن نامین لیڈر، سردار و میر معبران کئیلے آرت و تاسے آپ سر نہ کت۔ چشین سکّین ساھتا یے تئی جان و منی جان لیڈر گار اَنت!
هنچوش که هنّو گار اَنت، ھمے وڑا دوز و چانگڑین لیڈر بیگواہ بات اَنت۔
هیچ نظری موجود نیست:
ارسال یک نظر
وتی کلوا چێرا نبیس إت