مشرقی بلوچستانءِ ڈیرہ بگٹی دمگا پاکستانءِ فوجی یورش برجاہ اِنت۔ چہ گوئستگین شنبہءِ روچا انگتین یے یورشءِ سببا تنے وھدی بازین بلوچانءِ شھید بیگ و فوجیانءِ کشگ بیگءِ حال شنگ بیان اَنت۔ دوشنبہءِ روچا 'چھتر' نامین ھندےءَ چار سرمچار و یک فوجییےءِ کشگ بیگءِ حال پاکستانی حالتاکان شنگ بیتگ۔ ابید چہ اِشان بازین بلوچانءِ دستگیر بیگءِ حال ھم آتکگ۔
چہ ستمبرءِ اول سرا جنگا مھتل کنگءِ سرمچارانءِ جار جنگا رند بگٹی بلوچ میتگانءِ سرا ھیلگرین فوجءِ ئیر جنگا ابید چہ لھتیان آدگہ پھکین بلوچ سیاستکار و ٹولیانءِ دپ گشیگا دؤتکگ۔
یوکین بیان کہ گندگ بیگا اَنت آ چہ نشنل پارٹیءِ جھدکارانءِ نیمگا پیداگ اَنت۔ اشانءِ کشا بلوچ یومن رائٹس کونسلءِ میر غلامحسین بلوچ ھم یک بیانےءَ ڈیرہ بگٹیءِ سرا فوجی یورش ئیر جتگ۔
حالتاکان شنگ بیتگین بیانےءَ نشنل پارٹیءِ کماش داکٹر مالک بلوچ گشتگ کہ یک نیمگے 'عام معافی' و بلوچستانءِ مال، مڈّی و واکا بلوچانءِ دستا دیگءِ گپ بیگا اَنت، آدگہ نیمگا طلفین چک، بزگین جنین آدم و بے میارین بلوچ کماش، جوان و نوجوان کشگ، گرگ و بندیگ کنگ بیگا اَنت۔ یے پھک پیئش دار اَنت کہ پاکستانءِ سرا کُجا یکّین ٹولی حکومت بہ کنت بلوچانءِ سرا یکّین ڈئولا زؤراکی برجاہ مان اَنت، چیاکہ پھکانءِ مقصد بلوچ راجی مڈی؛ قدرتی مال، زربار و سرڈگارا آوار جنگ اِنت۔
نشنل پارٹیءِ میر مھیم خان بلوچ گون وتی ھمبلان ڈیرہ بگٹی دمگا فوجی یورش ئیر جتگ۔ و وخشیانءِ ڈئولا بلوچ میتگانءِ سرا ھیلہ کنگ و بے میارین زھگ، جنین آدم و کماشان کشگءِ پاکستانی کارپد حیوانی کار مارتگ اَنت۔
بلوچ یومن رائٹس کونسلءِ انفارمئشن سکریٹری میر غلامحسین بلوچ ھم نوکترین فوجی یورشءِ سببا مان ڈیرہ بگٹی دمگا جنین آدم و چکّانءِ کشگ بیگ ئیر جتگ اَنت۔ آئی گيئش کتگ کہ پاکستانءِ دستا بلوچ نسل کُشی گرما گرم دیما روگا اَنت۔ مردم بے میار چہ وتی لؤگ و میتگان در پہ در کنگ بیگا اَنت۔
میر غلامحسین گيئش کتگ: آزادی قدرتءِ داتگین انسانی حقے اِنت و بلوچ پہ اشیءِ پچگرگا جنگا اَنت۔ و الّما تنا وھدی وتی مقصدا سوبین نہ بنت یے جنگ دیما روانء بیت۔ آساپ انتخاب توار
هیچ نظری موجود نیست:
ارسال یک نظر
وتی کلوا چێرا نبیس إت