إسلامی کٹرانءِ بُنجاہ و إقتصادی مشکلانءِ أنبارین پاکستانءَ یک دگہ مشکلے کہ سر چست کتگ آ مان إسلام آبادءِ پارلمنٹا مشکانءِ یورش إنت۔ مشک چہ برقءِ سیمان بگر تا ٹلفن و کمپیورانءِ وائر، ھچ پشت نہ گيجگا أنت۔مشکانءِ یورشا إے أٹمی طاقتءِ پارلمنٹءِ باسک پونزا رسینتگ أنت و ضروری سرکاری کار مھتل بیگا أنت۔ دو ھفتگ جاری بیوکین دوئین پارلمنٹانءِ یکجاھین چیرین دیوانءِ وھدا پارلمنٹا چارگ وارگ کنوک مشکانءِ گرگا دست کٹ بیتگ أنت۔
درملکی حالتاکےءَ چہ پاکستانءِ إنگلش زبان حالتاکےءَ نقل کتگ و نبیستگ کہ پارلمنٹءِ نشستءِ دورانا ھنچین وھد ھم آتکگ کہ مشک دیوانءِ تھا پُتِرتگ أنت و باسک إش سِٹینتگ أنت۔ خاص پہ جنین باسکان جاور سک ترسناک بیتگ أنت۔
پاکستانءِ أڈ کتگین تـَلک چير کنگ بیگا أنت و درمان ریچگ بیگا أنت، بلے گندگا ھچ کار نہ کنگا أنت و روچ در روچ مشکانءِ حساب گيئش بیان إنت۔
ھندوستانءَ کہ پاکستانءِ ظاھری دشمن و خونی سیاد إنت، لھتے ماہ پیسرا سوج داتگ أت کہ مشک گرگ، کباب کنگ و ورگ بہ بنت۔ إے ڈولا وراکءِ کمّیءِ جیڑه کہ دنیا گون آئی دیم پہ دیم إنت، حل بیت۔ ألبت مشکانءِ جیڑوا حل کنگا رند نین ھندوستان گون دگہ ڈولین مشکلے گٹگیر إنت۔
اؤدءِ سرکارءِ نوکین دلسیاھی آئیءِ فوجیانءِ شرابی بیگ إنت۔ سرکارءِ پریشانی إے نہ إنت کہ فوجی شرابی بیگءِ سببا بے پکار بنت، راستیا آ پریشان إنت کہ میلیونانءِ حسابا زر خرچ بیگا إنت۔ یوکا گوستگین سالا 100 میلین روپیاءِ شراب هندوستانءِ فوجا وارتگ۔
Rights reserved by www.balochinews.com
هیچ نظری موجود نیست:
ارسال یک نظر
وتی کلوا چێرا نبیس إت