راجی آزادیءِ جهد دیما روان إنت، مزاکرات دردا نہ ور أنت -بی آر پی

بلوچ رپبلکن پارٹیءِ سکریٹری جنرل داکٹر بشیر عظیم گشت کہ آ پہ بلوچانءِ آزادی جھد کنگا أنت و تنا وھدی کہ آزادی پچگرگ نہ بیتگ، جھد دیما روانء بیت۔ گون ما پرلچّتگین مزاکراتءِ گپ کہ حالتاکان شنگ بیتگ أنت، راست نہ أنت۔ مزاکراتءِ حالان شنگ کنوکین مردم مئے راجی جھدا نزور کنگا گلائیش أنت و الّما بے سوب بنت۔ آ کس کہ لوٹ أنت گون مزاکرات بہ کن أنت، أصلا بے واک أنت۔ روچتاک توار

یونیسف وتی رپورٹےءِ چہ ڈیرہ بگٹی و کوھلو درپہ در کتگین 80 ھزار بلوچانءِ حالتءِ سرا دل پدردی درشان کتگ۔ پاکستانی فوجءِ یورشانءِ سببا نزیک سئے سال پیسر درپہ در بیتگین یے بلوچ جعفر آباد و مراد جمالی ھندان تلپچین آسمانءِ چیرا دار و پیشی کـُٹِگ و ساھگانءِ چیرا گون چوریگان زند گوازینگا مجبور أنت۔ رپورٹءِ ردا یے مردمان نہ پہ وَرَگا صافین آپ رسگا إنت، نے کہ سئے وھدءِ وراک۔ إیشانءِ زھگ وڑ وڑین نادراھیانءِ آماچ أنت و سلامتین ورنا چہ وانگ دربرگا زبھر أنت۔

چہ شاہ نورانیءِ زیارتا چھر کنوکین بس درّےءَ کپتگ و رند قبیلہءِ سوارین مردمان 9 کشگ و 35 ٹپّی بیتگ أنت۔ ٹپّيان 12 کسانءِ حالت نگیگ أنت۔ یے بس چہ حب شهرا 80 کلومیٹر دیر دیم پہ ٹنڈو اللہ یار روگءِ درگتا سر چگلتگ۔

چہ چمن دیم پہ کوئٹہ راھیین 147 أوگان پاکستانی واکان دستگیر کتگ أنت۔ روچتاک آساپءِ ردا چہ إیشانءِ گورا حسّاسین جاگوانءِ نقشہ ھم درکپتگ۔ ترس ھمش إنت کہ یے پہ ٹرورسٹی مقصدان بلوچستانءَ پترتگ أنت۔

روچتاک آساپ نبیستگ که بلوچستان نشنل پارٹی- مینگلءِ مرکزی کمیٹی مروچی بیگاہءِ کلاک 3ءَ مان بلوچستان إسمبلی باسکانءِ ھاسٹلا دیوان کنگا إنت۔ مان یے دیوانا بلوچستان، ملک (؟) و میان اُستمانی جاورانء سرا گپ بیگی إنت۔ دیوانءِ پاگواجھیءَ پارٹیءِ سکریٹری جنرل حبیب جالب کنت۔
ترانگ بہ کپ إت کہ یے پارٹیءِ ھچ باسک بلوچستان إسمبلیءِ باسک نہ إنت۔ پدا ھم اسمبلی باسکانءِ ھاسٹلا إیشانءِ دیوانءِ بیگ مردمان ھما بلوچی بتلءِ ترانگا دنت کہ گشیت 'گولو حرام إنت، آپشک حلار!' ھؤریا مینگل پارٹیءِ نزیکی گون پیپلز پارٹیءِ رئیسانی سرکارا ھم ثابت بیگا إنت

Rights reserved by www.balochinews.com