"سچکان"ءَ وانگ ھژدری إنت. چمشانک: ولید گربنی

قصہ چوش بنا بوت کہ مڈل إیسٹءَ جاہ منندین یکـّے چہ منی سنگتان جُست کت " تو ماھتاک 'سچکان'ءِ نوکیں شماره دیستگ؟"
یورپءَ نندگءِ سببا منا أولا بس یک ماھتاکے دستا کپگا أت، آ أت واجہ بندیگءِ 'بلوچی' إیشیا أبید بلوچی لبزانکے ھست أت کہ بند بیتگ أت۔ بلوچی زندءِ نام من إشکتگ أت و بس؛ تاکبند سچکانءِ رنگ تنے وھدی من نہ دیستگ أت۔ سچکان وشیں نامے، بلے إے ناما ماھتاکے ھست أت من ھچ سھیگ نہ إتاں۔ من وتی سنگتا ھم ھمے گپ گشت۔
آئیا درّائینت " تو وا لندنءَ إیشیءِ جاھگیرئے!"
آئیءِ ڈولا من ھم حیراں بیتاں۔ من تاکبندےءِ جاھگیراں و جاھگیر بیگءِ حال وتی جاھا من ماھتاکءِ نام ھم نہ إشکتگ أت!

خیر إے گپ دیمترا شت و یک روچے واجہ راشد بلوچءَ نہ زاناں چہ کجا منی نمبر درگپتگ أت و منا ٹلفن ئی جت۔ مئے گپ بیت، گوں یکـّا دگرا پجـّاروکی بیت و آئیا منا سھیگ کہ ماھتاک سچکانءِ شونکار ھمائی إنت۔ من چہ آئیا دسبندی کت کہ پہ من یک تاکے راہ بہ دات تانکہ من بہ زاناں إے چونیں رنگئے إنت۔ آ گپ گوَست و شت تا ھمے نومبر ماھا کہ منی سر کراچیءَ گپت۔ من تچکا لیمارکیٹءَ بلوچی کتاب بھا کنوکیں دکاناں وتا سر کت و سچکانے زرت۔

ھمے تاکبندءِ چکـّا واجہ راشدءِ ٹلفن نمبر ھست أت۔ آئیا من ٹلفن جت۔ گڈا ھما روچا منی گورا وتا ئی سر کت و منا شرفدار ئی کت۔ ما نشتیں گپ تراں بیت۔ واجھا پہ من لھتے تاکبند و کتاب ھم آرتگ أت۔ چدا پیسر چہ واجہ دشتیاریءِ گورا ھم لھتے کتاب منا رستگ أت۔ نیں منی گورا پہ وانگا گپڑے کتاب جم بوت۔

واجہ راشدءَ واھگ ظاھر کت کہ من وتی لیکواں آئیءِ شونکاریءَ شنگ بیتگیں 'سچکان'ءِ باروا بہ نبیساں۔ بزاں وتی نظراں بہ گشاں۔ آ وھدی منا موہ نہ بیت۔ تاکبند من شرّی سرا چارإت نہ کت أنت۔ ألبت، لھتے تاک گوں وت آرت أنت۔ وتی فرصتا همے تاکاں براں برانا من چارگا بیتگاں

پھکانی باروا من وا ھچ گشت نہ کناں۔ ایوکا یک تاکے وتی دیما کنگایاں و آئيءِ باروا إے سیاھگا راھا وانوکاں چیزے گشگ لوٹاں۔ ألبت، مردم باید پاچ جان محمد دشتی وتی قدا بہ چاریت۔ منی قد إنچوک نہ إنت کہ یک علمی چمشانکے بہ دیاں۔ بس وتی کسانیں دیدا چیزے کہ سرپد بیتگاں درشان کناں۔

واجہ راشد بلوچءِ آرتگ و منا داتگیں تاک من دیما إیر کت أنت، و چؤش إیرانیاں پالے جتاں۔ بزاں چم بند کت أنت و چہ إیشانی نیاما یکـّے در کت۔ إیشی نومبر 2006ءِ تاک إنت۔ ھمشی سرا کسانیں چمشانکے دیاں۔

ھو! نام ئی 'سچکان' إنت۔ سرتاکا واجہ شکراللہءِ رَزتگیں ندارگے إنت۔ مردے گوں بُنڈیں ریشتاں تلپچیں آسمانءِ چيرا نشتگ و دیم ئی گوں بے تاکیں درچک و تاموریں کوھان إنت کہ روچ زردءِ رنگ إیشانی سرا تالان إنت۔ آسمانءَ جمبر ھم کوھانی ڈولا سھرچک أنت۔ عکسءِ لمباں سچکانیں تگردےءِ ڈولداریں گواپءِ دَرور ديگ بیتگ۔ سرتاکءِ توکی نیمگا تبلیغ أنت۔ پدا تاکے لیٹینگا رند 'سچکان'ءِ نام إنت کہ إے بی سی سرٹیفائڈ إنت۔ شنگ کنوکانی لڑ إنت۔ کراچی و گوادرءِ ڈس أنت۔ بھا ئی 25 کلدار إنت۔ یک دگہ تاکے لیئٹنگا رند جھگیرانی لڑ إنت۔ آ دگہ تاکا 'نچین' بزاں ندکارانی لڑ إنت۔

چدا دیمتر إداریہ إنت کہ مبارک قاضیءِ بندیگیءِ سرا إنت۔ وشین وڑےءَ نبشتہ إنت۔ ألبت لھتے فروف و لھتے لبزانکی ردی ئی مان أنت۔ ھمے جیڑہ ماھتاک بلوچیءَ ھم ھست إنت و إمبری گوں واجہ بندیگءَ اے باروا من گپ جتگ أت۔

آ کشتر دعوتءِ رسول۔۔۔ سرحالا إبنءِ حاجی پنچ شنبہءِ شعرے شنگ إنت۔ چہ عربی گالان سرّ ریچ و دراجکشیں شعرے اِنت۔ کوھنیں بلوچی شعرانی یادا تازہ کنت۔ پدا من وانت "بلوچ و بلوچی" کہ غنی پھوالءَ نبشتہ کتگ۔ باز شریں نبشتانکے إنت۔ وشیں گال، وشیں بتل و گالبنداں سرّریچیں إے سیاھگ بلوچی أرزشانی (values)ءِ سرا إنت۔
واجہ پھوالءَ نبشتہ کتگ "۔۔۔ بلوچی فلسفہءِ ردا ھر بلوچءَ أبید چہ بلوچی کردا دگہ ھچ چیز شرفدار نہ کنت۔ پمشا بلوچ گش أنت 'جوھر بلوچءِ غیرت انت'۔"
دیمترا واجھا یک دگہ بلوچی بتلے داتگ کہ گشیت "شپ پہ إستار وش أنت و گیابان پہ بلوچ"۔ إے دویں بتل پہ من نوک أنت۔ منا دوست بیت أنت۔ مانا إیش ماں إنت۔ دومی بتلءِ مانا واجہ پھلوالءَ سرکچ داتگ "۔۔۔گیابانءِ تھا نزور و کم اوپاریں مردم زند گوازینت نہ کنت۔ بلہ بلوچ گوں گیابانا ھنچوش لچّتگ کہ إستار گوں آسمانءَ۔ ھمے اوپار کنگءِ بلوچی راھبندا بلوچ گوں نہ وشیں جاوراں دیم پہ دیم بیگءِ ھاٹی داتگ أنت"۔
'بلوچ و بلوچی'ءِ تھا واجہ پھلوالءَ إے راستی وشیں وڑےءَ بیان کتگ کہ پاکستانیانی چپ کہ نام إش چہ وتی سرڈگارا رستگ أنت؛ بلوچانی سرڈگارءِ نام گوں بلوچاں ھمگرنچ إنت۔ صداں ھزار سال پیسر وھدے بلوچ آتکگ أنت و إے خدائی سرڈگار إش وتی لوگ کتگ، گڈا سرڈگارءِ نام بلوچستان جؤڑ بیتگ۔ پمیشا بلوچ گش أنت:
کوھنگءِ إے کوھین تلار
کسّی پتءِ میراث نہ أنت
ما گون سگاراں گپتگ أنت

إدا کوھنگءِ کوھیں تلاراں گوں سگاراں گرگءِ شعر-منی خیالا- راستیءِ قالبا شرّی سرا جاہ نہ کپیت۔ پرچا کہ وھدے تو گوں سگاراں چيزے گرئے بہ زاں تو إیشیا پہ زور چہ دگہ ٹک یا راجےءَ پچگرئے۔ بلوچاں بلوچستاں چہ کسا پچ نہ گپتگ۔ إے سرڈگار ھنچوش کہ نبشتانکا گشگ بیتگ تلپیں خدائی زمینے بیتگ کہ بلوچاں آباد کتگ؛ ألبت، گوں سگاراں پھازتگ اش۔
صد خبرا یک خبرے کہ إے نبشتانک باز جوانیں بنشتانکے إنت و بلوچانی شرّیاں بیان کنگا إنت۔ أگر گالانی تکراری کمتر بہ بیتین أت، گڈا نبشتانک وتی مٹ وت بیتگ أت۔
دیمترا میر کمبرءِ ماتءِ بلوچی صفت بیاں بیتگ أنت کہ آئیا وتی بچّءِ کشگ بیگا 'ھلو ھالو' کتگ۔ شعرءِ لھتے بند ھم دیگ بیتگ أنت۔ پدا 12 نکتواں بلوچی أرزش نز آرگ بیتگ أنت و گوں إے گـُشتِنا نبشتانک سرجم کنگ بیتگ کہ 'بے تاوانا بلوچ سیت نہ کنت'۔

تاکا لیٹینگا واجہ أبو جلالءِ نبشتانکے 'ھستیں سیاسی جاور و بلوچانی جھد' سرحالا شنگ إنت۔ إے نبشتانک گيشتر نواب أکبر شھباز بگٹیءِ شھادتءِ چپ چاگردا پر ترّیت۔ ألبت، مشرفءِ ھشت سالگیں سرکارءِ باروا إشاروے کنگ بیتگ۔ إے إشارہءِ تھا اُستاد و شاگردءِ پگلءِ قصہءِ مثال دیگ بیتگ کہ شاگرد باریگ باریگا پگلءِ دست وپادان بُرّ أنت و وھدے پگل بے دست و پاد بیت سُر إت نہ کنت۔ ألبت آ گشیت کہ إیشیءِ مانا إے نہ إنت کہ پگلءِ مارشت مُرتگ أنت، درداں مارگا نہ إنت۔ راستی إیش إنت کہ پہ وتی دردانی درشان کنگا پگلءِ وسیلہ پچگرگ بیتگ أنت۔ ھمے ڈولیں حال آ ملکءِ مردمانءِ گشگا إنت۔
پہ پنجابءَ چہ بلوچستانءِ نیمگا دیم داتگیں فوجیانی لاشانی قصہ دیگ بیتگ۔ قلات جرگہءِ قصہ ھم آرگ بیتگ۔ ماں راڈیو بلوچی إف إم –سویڈن نواب بگٹیءِ گپانی مثال دیگ بیتگ۔
بلوچستانءَ نوزدہ و نیم أرب روپیاءِ سرکاری لب و إے زر چے ڈولا وتی گچینی مردماں بھر بیت کن أنت، چمشانکے دیگ بیتگ۔ بلوچانی وت ماں وتی ناتپاکیا بلوچ و آوانی دشمن چے ڈولا گندگا بنت، گوں مثالاں ظاھر کتگ۔ لایق ذکرین مثال میر ھزار خان بچارانی‏ءِ سروکیا لیویز فورسءِ إنت۔ پدا آئءِ بچ میر جمعہ مریءِ وبستایٹ 'بلوچ یونٹی'ءِ مثال آتکگ کہ بلوچ سرمچارانی پلانگریا زیریت۔
ماں أمریکا جوڑ بیتگیں ھوربند 'فرینڈز آف بلوچستان'ءِ ذکر ھم ھست إنت۔ إے پھکیں جیڑہ گوں لھتے راستیاں ھنچوش دپ ماں دپ داتگ أنت کہ چہ نواب بگٹیءِ شھیدیءَ رند بلوچستانءِ جاوراں سرکچ ورگا بازیں شوھازکاراں کمک کت کنت۔

'جامءِ کتاب پیداک إنت'. إیشی شونکار راشد سیدءِ وتی نبشتانکے إنت۔ چہ مشرفءِ کتاب 'دی لائن آف فائر'ءَ بگر تانکہ بانک نرگس بلوچءِ کتاب ' دی ڈیت آف إے لاین'ءِ ذکر آتکگ و ثابت کتگ کہ ھر کس کتابے نبشتہ کنگا إنت، پمیشا جام محمد یوسف ھم پشت نہ کپگا إنت۔
آئیا درشاں کتگ کہ جام فوج و بلوچ سیاسی ٹولیانی توکی حالاں سھیگ إنت، امید اِنت بازیں راز تالان بنت۔ اگر کتابءِ تھا خبر إیمانداری سرا شنگ بہ بنت، گڈا اھمیت ئی باز بیت اِنت۔

عمر عثمان بلوچءِ 'جبینءِ آس روک إنت' نبشتانک باز سرپدی دنت۔ خاص ھما ندکار و ازمکارانی باروا کہ آواں نواب أکبر شھباز بگٹیءِ شھادتا رند پاکستان سرکار تھروز کتگ و وتی پڑاں کتگیں کارانی بروردا رستگیں سرکاری داد نہ زرتگ أنت و یا پدا سرکارءِ کٹـّا چگل داتگ أنت۔
چہ إے ندکاراں یکـّے زاھدہ حنا إنت کہ گشتگ ئی "چشیں واریں ملکےءِ دادا من ھدوک نہ آں کہ وتی باسکءِ پروشگا چست بیتگ"۔ پدا سعداللہ جان، بی بی نسیم زھرہءِ نام ھم دیگ بیتگ أنت کہ وتی داد إش نہ زرتگ أنت۔
واجہ صبا دشتیاریءِ نام، واجہ نادر قمبرانی، داکٹر ناگمان، ظفر علی ظفر، منظور بسملءِ نام داداں نہ زیروکیں ندکارانی لڑا گون أنت۔ بلوچی گشندہ واجہ عارف بلوچ ھم وتی دادا سرکاری واکانی دیما جنوکیں ھیروے پیشدارگ بیتگ۔
عارفءِ ناما گندگا رند منا یک کوھنیں گپے یاد آتک۔ من أگر رد مباں 2003ءَ عارف، نورخان و دگہ لھتے گشندہ مڈل إیسٹءَ یک زیملی دیوانے کنگا إتنت۔ إیشی آنلائن شنگ بیگا أت۔ لندنءَ نندوکیں من ھم گوشدارگا إتاں۔ عارف و نورخان مردمانءِ جُستاں پسّو دیگا إتنت۔ من چہ عارف جُست کت "شما پیسری بلوچ گشندوانی ڈولا پرچا راجی سوت نہ جن إنت۔ تا راجی مارشت ردوم بہ زیر أنت؟"
آئی پسّو دات "واجہ تو بلوچستانءَ نہ ئے، پمیشا راجی مارشتانی باروا فکر کنئے۔ إدا ھچ کس راجءِ فکرا نہ إنت"۔
آ سال دیریگیں سالے نہ أت کہ مارشت إے ڈولا إتنت۔ نوکی دوسال گوستگ أت کہ عارف بلوچءَ بلوچانی سرا زوراکی مار إتنت و چہ سرکارا رستگیں دادءِ پدی دیگا أبید پہ وت دگہ درے نہ دیست ئی۔
نبشتانکءِ توکا پشت کپتگیں ندکارانی نام آتکگ و چہ آوان گلـّہ کنگ بیتگ کہ پرچا آواں وتی داد سرکارا پدی نہ داتگ أنت! نبشتہ کارا خیال ظاھر کتگ کہ داداں پدی سرکارا دیگءِ سببا شاید سرکارا گـَرَز مہ بیت، بلے میان اُستمانی چاروک گند أنت کہ إے سرکار مردمانی دلاں چنچوک گِران إنت۔

تاکدیم 22ءَ منی دلپسندیں رنگ رَز واجہ شکراللہءِ تران أنت۔ إدا سچکانءَ گوں واجہءَ گند نندے کتگ۔ شکراللہءَ علمی و گچینی جُستانی پسّو جوانیا داتگ أنت و وانوکاں سرپدی داتگ کہ آئی چے ڈولا چہ یک نوکباھندیں رنگرزےءَ شتگ و نامداریءِ قلاتا سر بیتگ۔ آئیءِ اُستاد نامدارین کوّاس شاہ نواز خان بوتگ۔ ماں أمریکن آرٹس کونسلءَ آئیا رنگرزیءِ کورسے ھم دربرتگ۔ گوں وانوکاں واجہ شکراللہ‏ءَ وتی بچاروکی چوش کتگ "مں بندرا پسنیءِ نندوکیں مردمے آں۔ 1947ءَ سبزلءِ لوگا ودی بیتگاں۔ 10 کلاس چہ ھمودا دربرتگ، پدا کراچیءَ آتکگاں۔ چہ ھمدا بی إے پاس کتگ۔۔۔ چہ کسانیا رنگ رزی و نکش کشیءِ ھب بیتگ"۔
شکراللہءِ گشگ إنت کہ آئیا بازیں پاکستانی پیشداشتاں (نمائشان) بھر زرتگ۔ اودا درامداں آئیءِ رزتگیں ندارگ دوست بیتگ أنت۔ و بازیں دانـَگ شریں نھاداں بھا ھم بیتگ أنت۔ گرانبھاتریں ندارگ 20،000 روپیاءَ بھا بوتگ۔
نامداریں مردماں آئیءِ رزتگیں ندارگ زرتگ أنت۔ زیروکانی نیاما وزیر أعظم شوکت عزیرءِ جن ھم ھوار إنت۔ أمریکائی ریسٹورانٹ چئین 'KFC'ءَ ھم گوں آئیا سئے سالءِ قرارے بستہ بیتگ۔ إیشیءِ ردا شکراللہءِ أڈ کتگیں ندارگ ماں جھانءِ أواریں کنڈاں ھستيں رسٹورانٹاں درنجگ بیتگ أنت۔ پہ درور ماں ٹوکیو و مصرءَ KFCءِ یک یک رسٹورانٹےءَ آئیءِ رزتگیں ندارگ لچّتگ أنت۔
واجہ شکراللہءَ گشتگ کہ آئی وتی ندارگانی توکا گيشتر بلوچی رنگ پیش داریت۔ إے خبرا وانگا رند منی دلا خیال آتک کہ أگر آئیا پاکستانی رنگ پیش داشتین أنت، گڈا ألـّما مروچی آ شرّی سرا آپ لاپ أت۔ نیں باریں چنچو بلوچ میر و مالداراں آئیءِ ندارگ وتی دیوانجاھانی براہ کتگ أنت! إے جستءِ پسوا ھما وت بہ دی أنت۔ چہ واجہ شکراللہءِ گپاں ھچ زانتکاری دستا نہ کپت، پرچا کہ گندگا آئی وتی مردمانی گلـّہ کنگا واھوک نہ إنت۔
10 تاکدیمانی إے گند نند لایق وانگا إنت۔ شاید پہ لھتے کساں واناک مہ بیت پرچاکہ باز إنکریزی گال کامرز بیتگ أنت۔
إے آر دادءِ دو تاکدیمی آزمانک 'جنگل کجا نیما کپیت' وش نبیستگ۔ لایق وانگ إنت۔ أگر إے آزمانکءِ نام 'آس دوستیءِ آماچ' بہ بیتین أت شرتر أت۔ پرچا کہ إیشی یک آس دوستےءِ قصّہ إنت۔
منا گیڑا اِنت وھدے من نوکی بلوچی وانگ بندات کتگ أت، گڈا تاکبندانی تھا إے آر دادءِ شعراں چم پرکپت أنت۔ یک دگہ نامداریں بلوچے آخر داد ھم ھست أت، پمیشا من ھر وھد إے آر دادءِ نام دیستگ أت، گڈا آخردادءِ ترانگا کپتگ إتاں۔

داکٹر ناگمانءِ نام پہ من نوکینے نہ إنت۔ منی خیالا ما یکـّیں دئورا بلوچی نبیسگ بندات کتگ۔ آ دگہ گپے کہ من یک نزاتکار و کاھلیں مردمے آں کہ دریں ملکاں کپتگاں، روچ در روچ وتی بلوچیءَ شموشگایاں، و داکٹر ناگمان بلوچی زبانءِ ترپوکیں إستارے جؤڑ بیتگ و جند ئی یک کوّاسیں وانندوے إنت۔
نیں ناگمانءِ نبشتانک وانت۔ نزاناں پرچا گشيگا من إے نبشتانک ساریا وانتگ۔ چؤ بیت ھم کنت، أگر دگہ جاھے شنگ بیتگ۔ سچکانءَ وا أولی بر إنت کہ من گندگایاں۔
'ھست أت یک زبانے' سرحالءِ سرا إے نبشتانکا بلوچانی نادلگوشیءِ نیمگا چمشانک دیگ بیتگ اَنت۔ و چہ بلوچاں دستبندی کتگ کہ وتی زبانءِ رکـینگا بہ تکش أنت۔ ھمے ڈولیں یک نبشتانکے واجہ داکٹر بدل خانءَ ھم 1990 دھرا نبشتہ کتگ أت۔ و ھمے ترس ظاھر کتگ أت کہ أگر بلوجاں وتی زبانءِ نیمگا دلگوش گوَر نہ کت، گڈا آوانی زبانءِ نام یوکا تاریخءِ تاکدیماں پشت کپیت۔

حنیف شریفءِ آجوئیءِ روچ من ساریا وانتگ أت۔ باز جوانیں و سادویں راھبندےءَ داکٹر حنیف شریف چہ وتی دستگیریا بہ گر تا پچیں جیلا روگءِ حال داتگ۔ إے نبشتاکءِ سرحال پشتو زبانءِ گالبندے إنت۔ "باران وریگے" بزاں ھؤر بیگا إنت۔ إے نبشتانکءِ ھر گال و جملہ لایق وانگ إنت، و یکیں رندا وانگا سرجمیں خبر دلا نکش بنت۔

دیمتری تاکان لھتے شعر أنت۔ من شاعری باروا باز گشت نہ کناں ألبت چہ ھمے شعراں یکـّے محمد روابند نبشتہ کتگ کہ إیشیءِ أولی بند إنت:
کورءِ کرّےءَ نشتگ و ھینّار إنت چیا
بزگین کیئپُک چہ منا سیاہ مار إنت چیا
منی خیالا إے بندءِ دومی ردا گال "چہ" باید "پہ" بہ بیتین أت۔ ھمے شعرءِ گڈسرا نبشتہ إنت کہ إیشی نواب بگٹیءِ ناما نبشتہ کنگ بیتگ۔ ألبت منا ھچ چشیں گپے دستا نہ کپت کہ نوابءِ کارانی یا آئیءِ ستاءَ بہ بیت۔ سبب ھمے بیت کنت کہ من شعراں سرکچ وارت نہ کناں۔
اُستاد عبدالمجید گوادری و إسماعیل تابانءِ دراجکشیں شعر ألـّما شرتریں وڑےءَ شھید أعظم نواب أکبر بگٹیءِ شھادت و چہ آئی رند چست بیتگیں جاوراں پیش دارگا أنت۔
پشت کپتگین شعرانی تھا فرید فراقءِ لچّہ " بلوچستان"ءِ وانگءِ درگتا منا خیال آتک کہ ماسٹر گوادریءِ 'ما چکین بلوچانی' باید مٹـّینگ بہ بیت و ھمے وڑین شعرے آئیءِ بدلا زیرگ بہ بیت۔ پرچا کہ 'ما چکـّین بلوچانی'‏ءِ تھا ترندیں و روایتی گالبند باز مان أنت۔
نوکیں دئورا مردم نہ لوٹ أنت کہ آوانی ترسا زمین بہ لرزیت۔ نیں مردم پہ وتی زمینءَ قربان بیگا واھوک أنت۔ آواں گون زمینءَ مِھر بیتگ۔ نے کہ نیں قلاتانی جکسینگءِ دئور إنت۔

أداکار و کمنٹئٹر نذیر أحمد فدائیءِ بیرانی سرا یاسین مجروحءِ نبشتانک سادہ و واناک إنت۔ من حیراں بیتاں کہ إنچو بلوچی شعری بندانءِ بیگا پد ھم واجہ مجروحءَ وتی مارشت اردو شعرانی بندان درشان کتگ أنت۔ نہ زاناں باریں منی ڈولا آئی شعر سرپد نہ بیت یا اردو شعرانی دوستی ئی باز ھست!

حاکمیءِ کرسی واجہ سلیم ھمرازءَ وش رجانک کتگ۔ وشیں قصوے إنت۔ منا دوست بوت۔ چہ إیشی پیسر منصورءِ داستان 'أنا ألحق' سرحالا شنگ بیتگ، من وانت۔ لھتے کسانیں أدبی ردی ودی أنت۔ چوش کہ دیم پہ پاھوا برگءِ گپ بیگا إنت، پدا سرا گڈگءِ خبر بیگا إنت۔ پاھوءِ مانا لوپ دیگ إنت۔ سرا گڈگ دگہ گپے اِنت۔ ألبت دویں راھبند مرگءِ سزاءَ کارمرز بی اَنت۔

خلاصہ: سچکان بلوچی تاکبندانی تھا شرتریں ماھتاک أگر گشگ بہ بیت، گڈا گوں ماھتاک بلوچی إنصاف نہ بیت، ألبت إیشیءِ شونکار گندگا شنگکاریءِ تک و پھناداں سرپدتر إنت و گوں کموکیں دلگوشداریءَ آ سچکانءَ شرتریں تاکبند جوڑ کت کنت۔ سچکان أگر وانگ مہ بیت، گڈا بہ زان إت کہ چہ بلوچستانءِ بازیں جاوراں سرپدی گوں ضرورتاں ھمرد نہ رسیت۔ پمیشا أگر بہ گشاں کہ سچکانءَ وانگ ھژدری (ضروری) إنت، رد نہ بی آں۔

بلوچ وبلوچی زندگ، و بلوچستان آباد بات۔