مان لندن کورٹءِ دیما فیض بلوچءِ خبرانءِ سرجم بیگا رند نین میر خیر بیار مریءِ بیان گوشدارگ بیگا أنت۔ جمعہءِ روچا خیر بیار مری وتی داتگین لھتے أخباری بیان کورٹا سرکچ دات أنت۔ إے بیان چہ سال 2000 تا 2005 مان پاکستانی حالتاکان شنگ بیتگ أنت۔میر خیربیار مریءِ دیما لھتے بیان وانگ بوت أنت و پدا چہ آئی جست کنگ بوت کہ بارین بیان آئی وت راہ داتگ أنت یا نہ۔ إیشیءِ پسّوا میر مری گشت کہ 2003ءَ دیم په إنگو گيئشتر بیان آئیءِ إجازتا شنگ بیتگ أنت، ألبت خبر و گال آئی وت گچین نہ کتگ أنت۔ سبب إیش بیتگ کہ آ چہ ملکا در بیتگ و اؤدءِ جاوران رسگا و تچکا سھیگ بیت نہ بیتگ۔ چدا پیسر داتگین بیان آئیءِ وتی بیتگ أنت۔
وھدے جست کنگ بوت کہ بارین آئی مان بیانان شنگ کتگین خبران حمایت کنت یا نہ۔ میر مری جواب ترّینت "ھو۔ جنرل مشرفءِ دئورا بلوچستانءَ ھر روچ بازین مردم دستگیر و لٹ کٹ بیگا بیتگ أنت و پدا چيرین بندیگجاھان راہ دیگ بیتگ أنت۔
بے میارانءِِ سرا تیر گواری بیتگ۔ روزگار لوٹوکین بگٹیانءِ سرا تیر گواری بیتگ۔ برق لوٹوکین کشار کارانءِ مچّیءِ سرا تیر گواری بیتگ و إیشیءِ سببا شش کس کشگ بیتگ أنت۔ منی ڈرائور، نور محمد، عبدالنبی بنگلزئی و دگہ بازین کس بے میارا جیلان دئور دیگ بیتگ أنت۔ منی ڈرائور بازین لٹان معزور کتگ۔ عبدالنبی بنگلزئی 10 سال بند بیگا رند نوکی یلہ کنگ بیتگ، ألبت آئی ھچ کورٹےءِ دیما برگ نہ بیتگ۔
سرڈگارءِ مڈ ّی إش ھول کتگ أنت۔ گوادر میگا پروجکٹءِ ناما، میرانی ڈئمءِ ناما، گئس و تیل درکنگءِ بھانوا مردمانءِ سرا زوراکی بیتگ۔ گوادرءِ بزگین مید شپی شپ گـُشگ بوت أنت کہ چہ لوگان در کپ إت۔ إے ڈولین جاوران أبید چہ جنگا مردمانءِ گورا دگہ راھے پشت نہ کپتگ"۔
وانتگین گيئشتر بیانان بلوچستانءِ بزگی ظاھر کنگ بیتگ أنت۔ ألبت لھتے جاھان سلاحبندین جنگءِ لوٹ ھم کنگ بیتگ۔
جنوری 2005ءَ روچتاک توارءَ شنگ بیتگین یک بیانے ھم وانگ بوت کہ اودا بگٹی ٹکّءِ سرا سرکاری زوراکی إیرجنگ بیتگ أنت۔
میر خیربیار یک جستےءِ پسوّا گشت کہ پاکستانی چاریگ مان برطانیا ھم آتکگ أنت و آئیا لب دیگءِ جھد إش کتگ۔ ألبت آئی گشتگ أنت کہ بلوچستانءِ وسائل سرجمین راجے أنت، پمیشا آ ھچ پیمین سودا نہ جنت۔ إیشیا پد، میر مری گشت "چاریگی أفسرا منا بیم تراپ دات کہ بلوچستانءَ منی چک و مردمان دلسیاہ کن أنت"۔
کورٹ پدا آیوکین دوشنبہءَ نندیت و پشت کپتگین بیان وانگ و سرکچ دیگ إبنت۔
ترانگ بہ کپ إت کہ میر خیر بیارءِ سرا مزنترین کئس کہ ثبت بیتگ، آ چہ برطانیا حالتاکی بیان شنگ کنگ بوتگ کہ إے بیانان میر خیربیار مری ناما چہ بلوچان لوٹ کنگ بیتگ کہ سلاحبندین جنگا حمایت بہ کن إنت و سرمچارانءِ ھمراہ بہ بنت۔
Rights reserved by http://www.balochinews.com/
هیچ نظری موجود نیست:
ارسال یک نظر
وتی کلوا چێرا نبیس إت