برطانیاءِ مسلمان گون طالبان ھور جنگا أنت۔ فوجی راز

برطانیاءِ فوجءِ چاریگان حال رستگ کہ لھتے برطانیائی مسلمان ناٹو فوجءِ خلافا گون طالبان ھؤر مان أفغانستان جنگا أنت۔

روچتاک 'ٹلی گراف' شنگ بیتگین حالا داتگ کہ إے خبر آوان چہ فوجءِ مردمان رستگ، و فوجا شک إنت کہ لھتے چہ إے جنگیان کشگ ھم بیتگ أنت۔ ترس ھمیش إنت کہ برطانیاءِ مسلمان چہ پاکستانی بنجاھان گون طالبان ھمراہ إبنت و دیم پہ أفغانستانءَ پہ جنگا رو أنت۔

مان ھلمند نادینتگین برطانیاءِ فوجی کماندارا گشتگ "لھتے چہ دشمنان کہ گون ما دیم پہ دیم أنت آ برطانیاءِ مسلمان أنت، ألبت کموکین حسابےءَ۔ بزان ھر یک بیڑے کہ آوانءِ سرا آرگ إبیت، بیڑ آروکانءِ توکا یک یا دو گون إنت"۔

ٹروریزمءِ دیما داروکین کمیٹیءِ سروک واجہ 'پٹریک مرسر' خیال ظاھر کتگ کہ مان أفغانستان مرتگین دشمنانءِ توکا أگر یک و دوئےءَ برطانیاءِ پاسپورٹ گون بہ بیت، پہ ما حیرانیءِ گپے نہ أنت۔

چہ ٹرورسٹان کہ مان برطانیا سلکاری إش کتگ و یا برطانیاءِ پولیس آوان لوٹوک إنت بازینے مان پاکستان ألقائدہ و یا طالبانءِ بنجاھانءِ ترّ تابا ألـّما شتگ أنت۔

إیشانءِ نیاما محمد صدیق خان کہ 7/7ءَ لندنءِ وتکش بمب تراکان گون أت و راشد رؤف کہ برطانیا آئیا لوٹوک إنت؛ ھؤر أنت۔

ٹلی گرافءِ حال دیمترا گشیت کہ نین ناٹو فوجیان 'طالبان' گالبندءِ کارمرزی أنگار کتگ و إیشیءِ بدلا 'دشمن' کارمرز کنگا أنت۔ سبب إیش إنت کہ زانگ نہ بیت کہ دشمن کئے أنت۔

Rights reserved by www.balochinews.com