لندن- نماینده بلوچی نیوز: 'بلمارش کراؤن کورٹ'ءَ میر خیر بیار مری و فیض بلوچءِ خلافا أنگتین ٹرورزم کئس نین وتی گڈی روچان رستگ۔ چدا پیسر ھمے گمان أت کہ 19 جنوریءَ کئس سرجم إبیت و جیوری پہ فیصلو کنگا راہ دیگ إبیت، ألبت نیامجیا جیورےءِ باسکےءِ لوگا نادراھییے بیگ سبب دو روچ کورٹ نہ نِشت۔
/
چہ إیشی رند مروچیین روچ سرکاری وکیلا وتی خبرانءِ لیس پلّیسا سرجمیا گوازینت۔ سرکاری وکیلءِ گورا نوکین ھچ خبر نیست أت۔ ھما پیسری خبرانءِ سرا جیوریءِ دیما گشگا أت کہ دوئین کس گون یکـّا دگرا ھؤر أنت۔ و إیشان ھوریا مان برطانیا پابندی جتگین ٹرورست تنظیمےءِ پروگرامانءِ دیما برگا کار کتگ۔
/
سرکاری وکیلا گشت کہ فیض بلوچ و میر مریءِ ردین کارانءِ نیاما 'بلوچ ورنا' و 'بلوچ وائس' ویبسائٹانءِ تھا ھنچین خبر، سیاھگ، عکس و ویڈیو شنگ کنگ کہ مان إیشان بلوچ جنگءِ سکین دیگ بیتگ أنت؛ هؤر أنت۔
/
ویبسائٹان أبید میر خیر بیار مریءِ ناما پاکستانءِ تھا شنگ بیوکین أخباران بازین بیان دیگ بیتگ أنت کہ چہ إیشان لھتےءِ تھا بلوچ گشگ بیتگ أنت کہ پاکستانی فوجءِ خلافا جنگا چست بہ بنت۔ سرکاری وکیلءِ دلیلانءِ ردا إے بیانان شنگ کنگا فیض بلوچءِ دست ھؤر بیتگ-
/
باندا -چارشنبہءَ فیض بلوچءِ وکیل وتی گڈی گپان جنت و پدا پنچ شنبہءَ میر مریءِ وکیل وتی خبران سرجم کنت۔ قاضیا اُمید درشان کت کہ جمعہ و آیوکین ھفتگءِ دوشنبہءَ آئی وتی گپان سرجم کنگا سوبین إبیت؛ پدا جیوریءِ باسک رو أنت و وت مان وتا شوربندی کنگ أنت۔
/
مرچی کورٹءِ تھا 'بلوچ یومن رائٹس کونسل'ءِ سکریٹری جنرل میر صمد بلوچ و دگہ لھتے بلوچ نندوک إتنت۔
Rights reserved by www.balochinews.com
هیچ نظری موجود نیست:
ارسال یک نظر
وتی کلوا چێرا نبیس إت