ھما بلوچ کہ ماں شمالی یورپءَ زندگی کن أنت، گڈا زان أنت برفین کوهءِ مطلب چی إنت. إے ٹرمنالوجی ماں مختلفین پڑاں؛ چوش کہ إقتصاد، سیاست و آمار بزاں حساب کتابا کار مرز إبیت. إے ٹرمنالوجیءِ مطلب إشنت کہ مردم إیوکا جاورءِ سرظاھری بھرا گندیت، ألبت آئیءِ مزنترین بهر بزان هشتاد در صدا نه گندیت. مزنتریں بھرا نہ گندگءِ مطلب إے نہ إنت کہ ایشی نیست إنت، بلکین أندیم إنت.
إسلام آباد وتهران مرچی چوش آسنین "تایتانیک" گرابا ماں أتلانتیک زرا دیم په برفین کوهےءَ که دیما مک إنت؛ روان أنت. تشے ترس إش نیست کہ گون إے برفین کوها ٹکـّر ور أنت، پروش أنت و چپی بی أنت. تایتانیکءِ معمارانءِ پیما آ فکر کن أنت کہ إے برفءِ ٹکـّر پولاتین تایتانیکءَ پرؤشت نه کنت! سما إش نیست کہ آ یک عظیمین کوهے إنت و إیوکا آئیءِ سر إنت کہ ظاهر إنت.
هر کسءَ کہ تایتانیک دیستگ، گڈا زانت کہ پولاتین تایتانیکءَ گوں برفین کوهءَ چونکا ٹکر وارت و دو نیما بیت. وهدے ٹکـّر ورگا پد تایتانیک دو نیما بیت، گڈا إیشیءِ أڈ کنوکاں سما بیت که برفین کوهءِ دیما پولاتین تایتانیک کمزورإنت۔
إسلام آباد و تهرانءَ مرچی بلوچ سرزمین وتیگی کتگ و بلوچءِ مسئلوا ھما برفین کوهءِ پیما گندگا أنت. گون پولات جوڑ بیتگیں وتی تایتانیکءَ دیم په آیی بران أنت. زانگ بیگا إنت که آوان پکائین إراده کتگ که گون آئیا ٹکر بہ ورأنت. واھگ إش ھمیش إنت کہ ٹکـر ورگا پد آئیا په مدامی گار و گمسار کن أنت. ألبت ودی إنت کہ شه تاریخءِ داتگین درسا آ شموشکار أنت.
عزت مندین وانوکان! بیا هوریا إے دمگءِ تاریخءِ نزیک ترین حادثوان چارین۔
وهدے پاکستان جوڑ بیت و بنگالیان وتی حقءِ رند گیری کت، گڈا پاکستانءِ فوج چو پولاتین تایتانیک مان أتلانتیک دیم به بنگالءَ -که چؤش که برفین کوها إیوکا آیی سر ظاهرأت -روان بیت تاکہ آئیا ٹکر به جنت و په همیشه چہ میدانا دیر به کنت. إے پڑا په وتی ماتی زبانءِ وانگ و نبیسگءِ حقءِ منـّینگا مچ بیتگین بنگالی شاگردانءِ سرا پاکستانی فوجا تیر گواری کت و بازین وانوک شهید کت أنت. آ وھدی پاکستانی فوجیانءِ کرد گون بنگالیاں هما وڑا أت که هیتلرءِ إس إس آر أفسران گون یهودیان کتگ أت. بلّی تورین آ وهدا بنگالی هم پاکستانی باشنده و مسلمان إتنت، أنگت پولاتین پاکستانی تایتانیک دیم په آ برفین کوها برگ بیت. همے راھا صدان هزار بنگالی شهید کنگ بیت أنت و صدان هزار جنینانءِ ناموس ءِ سرا بیڑ برگ بیت. وهدے که پاکستانیاں وتی پولاتین تایتانیک گوں برفین کوها ٹکر دات، گڈا سما إش بیت که آوانءِ چمّان صرف برفین کوهءِ سر ظاهر بیتگ۔ ألبت إے درگتا خبر چه هلوتا گوَستگ أت و پاکستانءِ پولاتین تایتانیکءِ یک نیمے وتواجهین راجے درؤشما بنلادیش جوڑ بیت۔
هنوں إسلام آباد و تهرانءِ پولاتین تایتانیک دیم په برفین کوه درؤشمین بلوچ قوما روان أنت و مقصد هم هما أنت. بزان بلوچ قوما چہ آئیءِ بنداتی حقان زبهر به کن أنت.
مرچی هریک چم پچ گندگا إنت که إسلام آباد و تهرانءِ واکدار بلوچانءِ برحقین لوٹان غیر إنسانی راهبندان پسّو دیگا أنت۔ برے سراوان إنت، برے زاهدان إنت و برے واش إنت که تهرانءِ رسترین فوج بزان مرصاد ، بلوچانءِ لوگان مان بنت، گون هزار بے حرمت و بے إحترامیا بلوچ وانندهان دستگیر، و وتی سیاہ و تھارین بندیجاهان بر أنت.
آدیما إسلام آبادءِ چاریگ آئی إس آئی إنت کہ مان بلوچستانءِ کنڈ کنڈا چو خونوار و ھـَڑکھی رسترا حق لوٹوکین بلوچ جھدکارانءِ سرا بیڑ بارت و یا آواں گریت، و بے گواه کنت. هنوں هزاران بلوچ بے گواہ أنت و کس نه زانت کہ زندگ أنت یا نہ ۔
تمپءِ دردناکیں سانحہ شرّیءَ شون دات کہ إسلام آبادءِ رودینتگین فوجءِ دلا بلوچانءِ خلافا چینچو کینگ ھست إنت. آوانءِ قبضہ گیریں سیاستءِ سیتا نہ إنت کہ چک، مزن و کسانین بلوچانءِ مچّیءِ إیمنیا به چار أنت، و به مار أنت که په وتی شهیدانءِ یاتءِ زندگ دارگا
سرجم بیتگ أنت! پمیشا آوان ھمے إیمنین مچی سگّ إت نه کت و مچیءِ سرا بیڑ إش برت، نوگلین مختار إش شهید و دگه دهان نفر إش
ٹپی کت أنت. تمپ چؤش که إسلام آباد یا راولپنڈی نہ إنت که اودان زندگیءِ ضروری آسراتی موجود به بنت. ٹپیگین بلوچ په دوا و درمانءَ باید صدان کیلومیٹر دیر برگ به بنت. نزیکترین منزل شه اودا کراچی إنت۔
راست إنت کہ تمپ بے حد پشتا دارگ بیتگ، بلے آئیا وتی پچار شرّیا برجاہ داشتگ۔ یک نمیگےءَ شاهی کلات و دگے نیمگےءَ شاهگانین نهنگ إنت بلوچان سکین دنت که چہ قوما بیخیال مه بنت.
إے ھم مند إنت کہ بانلیءِ درورین شیر زالین ماتےءَ داکٹر خالد کمبرءِ دروشما شیر گلڑین بچّے رودینتگ. بر ماءِ سرکار مخالفین راهشون 'سان سوچی'ءِ دَروَرین بانک کریمه بلوچ رودینتگ. إے مند إنت نلسن منڈیلا درورین غلام محمد رودینتگ. ألبت همے مند چہ دنیاءِ درستین آسراتیاں محروم إنت. إدا نه کتاب جاه هست, نه نلی آپ هست و نه سوچگی گئس! همے بلوچستانءِ گئس إنت کے پنجاپءِ هرکنڈا رسینگ بیتگ.
زبهریانءِ آماچین همے مندءَ بیمثالین جنک و بچ رودینیت و آوان درس دنت که إے ماتین وطن إنت و پہ إیشیءِ حقءِ أدا کنگا وتی جھدا سست مه کن أنت۔ برفین کوہءِ زیر آپین بهر إنت کہ چوشین بچ و جنک پَروَرش دنت.
همے برفین کوه ءِ زیر آپین بهر إنت که بلوچستانءِ گاندی بزان یعقوب مهرنهاد ئی پرورش داتگ. إے یعقوب أت کہ گون وتی گاندی وڑیں سگّ و اوپارا شیعه ملایانءِ رد بند داتگین قانونءِ تھا بلوچ قومءِ پجارءِ گپ ئی جت. آییءِ مهر أت که أولیگین رندا بلوچستانءِ بنجاهی شهر -دزاپءَ بلوچی زیملی دیوانے برجم دارگ بیت کہ بلوچ 'لجند' واجه حاجی کماخان بهر زرتگ أت. إے مهر أت کہ بلوچ ورنا ئی وتی إنجمنءِ ساھگا مچ کتگ إتنت.
إے تاسپیں جھدکار و دگہ هزاران بلوچ تنے وهدی إسلام آباد و تهرانءِ پولاتین تایتانیکءِ زدا آتکگ أنت و تایتانیک دیم به برفین کوها روان إنت!
چہ مندءَ بگر تا کہ کوھلو، ڈیره بگٹی، پنجگور، کلات، خضدار، خاران، حب، تمپ ، تربت، مستونگ و کوئٹهءَ إے أولی رند إنت کہ برفءِ زیر آپین بهر وتی یکجاهیا شون دیگا إنت. دگہ نیمگےءَ ما یک پختگین سلاح بندین جهدےءِ شاهدیں۔
إے أولی رند إنت کہ بلوچ قومءِ نیما چہ وتی ٹکـّی چاگردا ڈن سر کشتگ و یک بے مٹــّین سیاسی کردے پیش کنگا إنت۔
إے أولی رند إنت کہ شهید غلام محمد ڈن چہ وتی لوگءَ، ڈن چہ وتی میتگءَ، ڈن چہ وتی دمگءَ، یک قومی لیڈرےءِ حیثیتءَ زانگ بیتگ. سجهین بلوچستانءَ آئی منـّگ بیتگ۔
'تایتانیک داکٹرینان' هر وڑین خطر پیسرا چارتگ إتنت و شہ آواں رکـّگءِ سرجمیں توجیل ھم کتگ إتنت، بلے چؤش کہ برفین کوهءِ گیشترین بهر آپءِ چیرا أت، پمیشا تایتانیکءِ معماران میم نه کت و نه مارإتش. تایتانیک چہ پولاتءَ جوڑ بیتگ و ماں سبزین ساوڑءَ اُژناگا أت. چه برفین کوهءِ چیرین بهرا بے سما؛ همے فکرا أت کہ گون أولی ٹــَکرا آئیا چُنڈ چنڈ کنت و هچ چم آییءِ چونڈاں نہ گندیت. بلے تاریخ چؤش نه گشیت.
ما گندیں دنیاءِ هچ إمپراتوریا په زور غلام کتگین قومے مدام وتی کالونی جوڑ کت نه کتگ. غلامین قومان یک روچے غلامیءِ لوپ چہ وتی گردنءَ در کتگ. ألبت لهتے جاهان زیتر و لهتے جاهان دیرتر۔
پدّر بیت که برفین کوهءِ چیر آپین بهرا پرؤشک و نزور کنگ پولاتین تایتانیکءِ کارے نہ إنت. ألبت آییءِ وتی چیر آپین جنجال مشکل ودی کت کن أنت؛ چؤش که دنیاءِ آپ و هواءِ گرم بیگ! وهدے گرمین آپ برفین کوهءِ چیر آپین بهرا سر بیت، گڈا آییءِ آپ بیگ بنگیج إبیت. أگر همے درگتا پولاتین تایتانیک وتا په برفین کوها سر به کنت و آئیا ٹکر به جنت، گڈا ألما برفیں کوه پروشیت۔
همے درورءِ ھمردیا بہ چارین باریں تھران و إسلام آبادءِ پولاتین تایتانیکءِ ٹکرا بلوچءِ برفین کوه اوپار کت کنت یا نہ!
به چارین بارین إے سلاح بندین جهد بلوچءِ وتی واهگا بندات بیتگ یا چہ وتی مجبوری و بے وسیءَ؛ په وتی عزت، ننگ، ناموس، إنسانی کرامت و وتواجهیءِ پچگرگا!؟
إے پڑا چمشانک دیگا پد زانگ إبیت که بلوچ ءِ لوٹ نہ إنت کے کلانشکوف دستا به گریت. آئیا په مجبوریا کلانشکوف چست کتگ. تاکہ إسلام آباد و تهرانءِ پولاتین تایتانیکءَ په مقصدا سر بیگا مه إلیت۔
چوناهیا دنیا مدام بدلیانءِ تها إنت و ماں إے بدلیان مختلفین إزمکار کا أنت و رو أنت. دنیاءَ نوکین نوکین إتحادی جوڑ إبنت. زیین دوست مرچیین دژمن إبنت و یا زیین دژمن مرچیین دوست إبنت. إیشانءِ سبب هر قومءِ وتی مفاد أنت.
هما وهدا که مردم چہ وتی سیتان سرپد به بنت؛ همے پڑان رھیج گر أنت۔ پرچیا کہ هر سرپدین اُستمانا وتی قومی نپ چہ جندءِ سیت و کاراں دیماتر و عزیزتر إبنت۔
نین جست إیش إنت؛ بارین سُھرین رنگ، کلانشیکوف، لیلا خالد و چی گویراءَ هور کنگ و بلوچءِ جهدا گوں آوانءِ فکر و رھبندا بندوک کنگ بلوچ قومءِ حقا أنت یا کہ آ تاریخءِ هنچؤشین بهر أنت که مرچی بلوچءَ شه آوان سبق گرگی إنت؟ بارین بلوچ قوما مرچیین باریگانءِ همدروین إتحادی شوهاز کنگ ضرورت نه إنت!؟
دلگوش: إے سیاھگءِ راھبند کمّے مٹـّینتگ۔ پدا نبیسوکءِ إجازتا شنگ کتگ۔
Source: www.balochinews.com
هیچ نظری موجود نیست:
ارسال یک نظر
وتی کلوا چێرا نبیس إت