خاتمی دیم پہ إسلامی رواجءِ پرؤش دیگا راھی إنت؛ إسماعیل کوثری

إیرانءِ قومی إیمنی و درملکی سیاستءِ کمیٹیءِ چیردستیں کماشا گشت کہ إیرانءِ پیسری صدر محمد خاتمی پہ إسلامی رواجءِ بیگواہ کنگ و مغربی راھبندانءِ رواج دیگا إمبری گولائیش بیتگ۔

إسماعیل کوثری نامیں إے واکدارا گشت کہ إصلاح طلبءِ ناما خاتمی جھد کتگ کہ گوں مغربیاں وتا نزیک بہ کنت۔ أصلا گوں مغربیاں باز نند نیاد کنگءِ سببا آئی باز إثرمند بیتگ۔ ھمے سبب إنت کہ گوں 'جورج سوروس' گدار ئی کتگ۔

حالءِ ردا 9/11ءِ ھشتمی سالروچءِ درگتا خاتمیءَ ماں نیویارک گوں جورج سوروس گدار کتگ۔ واجہ سرورس شہ دنیاءِ أمیرتریں مردماں یکـّے إنت و 'آئی إس او' نامیں میان اُستمانی بنجاھےءِ سروک إنت۔

إیرانءِ سرکاری حالجاہ إرناءَ داتگیں حالےءِ ردا ھمے گدارا رند جورج سوروس شہ خاتمی نقل قول کتگ کہ مذھبیانءِ واکداریءِ درگتا جمھوریت رواج دیگ بیت نہ کنت۔
Source: www.balochinews.com