کٹر خیالیں رستر کرداں دو بلوچ جنکانءِ دیما تیزاب پر رتک

مشرقی بلوچستانءِ شھر دالبندینءَ دو کسانسالیں بلوچ جنک کٹریں لیکوانءِ واھندیں مردمانءِ رستری کردانءِ آماچ بیت إنت۔ إے دوئیں جنک کہ عمر إش 11 و 13 سال أنت دیم پہ وتی لوگا راھی بیتگ أنت کہ إنسانی دروشما گردوکیں حیواناں إیشانءِ دیما تیزاب پر رتکگ۔ إیشیءِ سببا ھر دوئیں زهگ ٹپـّی بیتگ أنت و پہ دوا درمانا کوئٹہ راھی کنگ بیتگ أنت۔

چدا پیسر کٹر خیالاں یک نبیستگیں جارے تالان کتہ بیتگ کہ جنیں آدم بے برقوا شہ وتی لوگاں در مہ کپ أنت۔ جارا داتگ که جنیں چک ھم درکپگا إلّگ مہ بنت۔ رستراں ھمے جار بلوچءِ ناما تالان کتگ۔ ألبت بلوچءِ دودمانا کسانسالیں زھگاں إے وڑا ٹپـّی کنگءِ درور ھچ جاگھا دستا نہ کپیت۔