شہ چاریں کنڈاں لھتے سرحال

ھر روچ دگہ زباناں الکاپیں سیاھگ شنگ بنت۔ اے سیاھگ اگر بلوچیءَ ترّینگ بہ بنت، بلوچ وانوکاں باز سرپدی رسیت و بلوچی لبزانکءِ دیمرویا کمک کن انت۔ پہ درور زرمبشءِ ویبسائٹا لھتے گچینی حال شنگ بیتگ۔ ایشانی سرحالانی رجانک چؤش انت۔

آذربائیجانءِ تھی جیڑواں ایرانءِ دستمانجی دوئیں ملکانی رشتگا سیاھیں ٹکـّے انت

"۔۔۔ اگر اے راستی دیما ایرکنگ بہ بیت کہ بازیں آذری ماں ایران ھست، منی خیالا ایرانی سرکارءِ کمک پہ ارمنستان کہ آذربائیجانءِ سرا دستدراجی کنت، منـّگی نہ انت۔ ما اے ردا ایرانءَ گوں ترنتریں گالاں ایرجنیں" علی احمدو گشت۔

قومانی ماتی زباناں افغانستانءَ وانگی کتاب شنگ بیت انت

ماں قومی زباناں کتابانی شنگ بیگا پد افغانستانءَ مدرسواں ماتی زباناں کتابانی وانیگ بندات کت۔

باریں مصرءِ شورش ماں ایران یک دگہ جُنزے چست بیگءِ سبب بی انت؟

پہ اودءِ پیسری شورشءِ ایرموش کنگا ایرانی رژیم میلیوناں رضاکار و پاسدارانی کاربندگا چک پد نہ بیت۔ البت مصرءِ رژیما زور کارمرز کنگءِ بدلا گوں مخالفاں جاورانی سرا خبر کنگءِ واھگ شون دات۔ و ظاھری دیوک ئی فوج سرا نہ دات انت۔

برطانیاءِ سرزویرا شہ ملکءِ مسلماناں لوٹ کت کہ کٹر پرستیءِ پلانگریا مہ زیر انت۔

دیود کامرونءَ گشت "اگر وتا برطانیائی زان ات، گڈا ادءِ ارزشتانی سرا شمارا باور بیگ لوٹیت۔ جمھوری رواج، جنیں و مردینانی برابری، و انسانی حقاں منـّوک بہ بی ات۔ چدا پد 'نفرتءِ درس دیوک' برطانیاءَ آیگءِ اجازت دیگ نہ بی انت۔"

ھمے وڑیں خیال جرمنی و فرانسءِ سروکاں ھم درشان کتگ انت۔ البت برطانیاءِ سروزیرا گشت کہ نیں گوں عمل پیئشدارگءِ ضرورت انت۔ خاص جنین و مردینانی نیاما فرقءِ درس دیوکانی دیم دارگ لوٹیت۔

پاکستانءِ سیمسری فوجءِ کانوائی شہ بمب تراکـّا رکّ ات

مستونگءِ نزیکا سیمسری فوجءِ کانوائیءِ گوزگءِ درگتا موٹر سائکلےءَ لچّینتگيں بمبے گوں ریموٹ کنٹرول تراکنیگ بیت۔ ایشیءِ سببا کسے کشگ نہ بیتگ۔ بمبتراکءِ ذمواری 'بلوچ لبریشن آرمی'ءَ وتی سرا زرتگ۔

بلوچستانءِ مولوی وزیرےءَ حرامءِ مال ورگ قبول کت

بلوچستانءِ عبدالواسع نامیں ملایےءَ منّ ات کہ آئیا شہ پارلمانءِ آدگہ باسکاں 9 میلیون پاکستانی روپیا پچ گپتگ تانکہ وتی میتگا مدرسوے اڈ بہ کنت۔ باید ات اے زر آدگہ باسکاں وتی وتی دمگانی دیمروئیا خرچ بہ کتین انت۔

مصرءِ 12 گلاں ایران ایرجت

مصرءِ دوازدہ سیاسی گلاں ایرانی رژیم ایرجت و گشت اش ایران جھدا انت کہ مصرءِ مردم و فوجءِ نیاما دلچلـّی اڈ بہ کنت و مصرءِ تھی جاوراں دستمانجی بہ کنت۔