دھشتگرد بیڑ کہ کار انت، کشگ ھم بنت: پاکستان

پاکستانءِ خیبر پختونخواہ برگنگءِ تھی جاورانی وزیر میاں افتخار حسینءَ گوں بی بی سی –اردو گشت: ھما مردم کہ دھشتگردانی کُشگ بیگا شہ قانونءِ راھبندا در لیک انت، اصلا دھشتگرداں کمک کن انت و آواں راھشونی کن انت۔

ماں سوات دمگا دستا کپتگیں جسدانی باروا گون بی بی سی وتی گالگدارءِ تھا آئیا گشت کہ دھشتگرداں بازیں پولیس و فوجی کشتگ انت۔ ایشی کشا عوامی نشنل پارٹیءِ 500 جھدکار و راھشون ھم ایشانی دستا کشگ بیتگ انت۔

وزیرا دیمترا گشت: ھما مردمانی جسد که دستا کپتگ انت، رستگاری واکانی سرا بیڑ کنگءِ وھدا جنگ بیتگ انت۔ یا ھما کس انت کہ وتکشیں واسکوٹ اش گورا پہ حملکہ کنگا راھی بیتگ انت. اے وڑیں مردم اگر جنگ مہ بنت، گڈا ناھودگین کن انت؟

آئیءِ خیالا ھما مردم کہ ایشانی کشگا شہ قانونءِ راھبندا ڈن لیک انت، شرّیں کارے نہ کنگا انت۔

کرنل عارف نامیں فوجی سروکےءَ بی بی سیءِ جستےءِ پسّوا گشت کہ ھر وھد یک خودکش بیڑے برگ بیت، گڈا ملکءِ چاریگ وتی کارا تیز کن انت۔ ایشیءِ سببا دھشتگردانی گوَم تنک بیت انت۔ اے درگتا لھتے دھشتگرد گوں چاریگاں مِڑ انت۔ ھمے مِڑانی وھدا شہ آواں لھتے کشگ بی انت۔