ماتی زبانانی میانملکی روچءِ درگتا ماں اواریں ھنداں بلوچ مچّی کن انت

ماتی زبانانی میانملکی روچ 21 فروریءَ دنیاءِ دگہ زندگیں قومانی وڑا بلوچ ھم مچّی و سمنار برجم دارگا انت۔ اے ردا ماں کوئٹہ، تربت، گوادر و کراچی دیوان سرجم کنگ بنت۔

ماں کراچی بیوکیں دیوانءِ بند بست بلوچی تاکبند سچکانءِ جھدکاراں کتگ۔ اے دیوانا بلوچ کوّاس واجہ صبا دشتیاری، روچتاک انتخابءِ شونکار واجہ انور ساجدی، لبزانکی جھدکار واجہ اے آر داد، واجہ غنی پھوال، واجہ رزاق سربازی و لطیف بلوچ تران کن انت۔ دیوانءِ جارچیں بلوچی شاعر واجہ اسحاق خاموش انت۔

ایشی 21 فروریءَ ماں فٹبال ھاؤس، چاکیواڑہ کراچیءَ بیگاہ کلاک 3ءَ بندات بیت انت۔

بلوچستانءِ دیوان شہ نشنل پارٹیءِ نیمگا برجم دارگ بیگا انت۔ اے ردا روچتاک انتخابءَ شنگ بیتگیں حالا داتگ کہ ماتی زبانانی میانملکی روچءِ درگتا 21 فروریءَ ماں تربتءِ ھوٹلےءَ بیگاہ کلاک 3ءَ دیوانے برجم دارگ بیت انت۔ اواریں زبانزانت ماں اے دیوانا بھر زیرگءِ دعوت دیگ بیتگ انت۔

نشنل پارٹی گوادر ھنکینءِ جھدکار عابد رحیم سھرابی و حمید حاجیءِ سرکشّيا بلوچی زبانءِ اھمیتءِ سرحالا 'آر سی ڈی کونسل –گوادر'ءَ ھم دیوانے برجاہ دارگ بیت انت۔ اے دیوان بیگاہ کلاک 5 بنا بیت انت۔

اودا ماں کوئٹہ بیوکیں دیوانا ھم نشنل پارٹی سرجم کنائینگا انت۔ ایشی گلءِ بنجاھی کارگسا بیگا انت و بندات بیگءِ وھد ئی بیگاہ کلاک 3 انت۔

نشنل پارٹیءِ سرجم کنگ بیوکیں دیواناں بی اس او –پجّار ھؤرکاری کنگا انت۔ ھر دوئیں گلاں شہ بلوچاں ماں دیواناں بھر زیرگ دستبندی کتگ۔