سید ظھورشاہ ریفرنس لائبریءَ بلوچی زبانءِ کلاساں دربرورکین شاگرداں داد دیگءِ پنچمی دیوان برجم دارگ بیت

سید ھاشمی ریفرنس کتابجاہ ءِ پنچمی داد دیوان میر احمد دھانیء ناما 

سیدھاشمی ریفرنس کتابجاہ ''ءِ پنچمی داد دیوان میر احمد دھانیءِ ناما یکشمبے ١٧جولائی ٢٠١١ ءَ سید ھاشمی ریفرنس کتابجاہءِ ماڑیا برجم دارگ بوت ۔ مراگشءِ دو بھر اتنت۔ اولی بھرا بلوچی‏ءِ بنگیجی سرٹیفیکٹ کورسءِ چکاساں سوبمند بوتگیں شاگرادں سندی داد دیگ بوت انت۔ ایشیءِ سرکشی ڈاکٹر حمید بلوچءَ کت۔ اولی و دومی اگدہ زیروکاں طلاہ و نگرہ ءِ تمغہ دیگ بوت انت. ایشانی پجّیا آدگه سوبینیں شاگردانی سند دیگ بوت انت۔

سندانی دیگا ڈاکٹر حمید بلوچءِ کمکا عبدالواحد بلوچ ، عبداللہ جان و وحید عامر بلوچ اسٹیج ءِ سرا ساڑی اتنت ۔ بنگیجی کورسا نوشکےءِ نورجھان عبدالحمیدءَ طلاھی و شکیلہ ثنااللہ ءَ نگرہ ءِ تمغہ رس ات۔ ھمے وڑا سرٹیفیکٹ کورسا شالءِ حفیظ اللہ مبارکءَ طلاہ و لیاری ءِ فضیلہ محمد سلیم ءَ نگرہءِ تمغہ زرت۔ 

امبری دوئیں کورساں ٨٠٠ ءَ گیش نودربراں داخلہ زرتگ ات کہ چریشاں بنگیجی کورسءِ چکاس ١٤٣ نودربراں داتگ و ١١٢ سوبمند بوتگ انت ۔ سرٹیفکٹ کورسءِ چکاس ١٨١ وانوکاں داتگ کہ چریشاں ١٥٧ سوبمند بوتگ انت۔

اے بھرء سروکاں وتی گپانی تھا ظاھر کت کہ سید ھاشمی ریفرنس کتابجاہءِ بنگیجی سرٹیفکٹ کورس کہ چہ ملیرءَ بنگیج بوتگ اتنت مرچی بلوچستانءِ دیر و دراجیں دمگاں چوش کہ پسنی، پیشکان، شال، تربت، گوادر، پیدارک، گومازی و دگہ جاگھاں وانینگ بیگا انت۔ نوکیں نسل زبان، علم و لبزانکءِ اے کاروانءَ یک پہ یک ھور بیان انت۔

اولی بھرءِ گڈسرا دودءِ پدا ھما مردءِ ناما کہ دیوان جمینگ بیتگ ات، آئی ءِ ھزمتانی سببا یک خاصیں ایوارڈے دیگ بیت ۔ میر احمد دھانیءِ ھزمتانی داد بانک زینب بلوچءَ زرت۔ ایشیا پد اولی بھر آسر بوت۔

دومی بھر بلوچی شعری دیوان ات کہ ایشیءِ پاگواجہ شرف شاد ات ۔ شعری دیوانا نامدار و نوک باھندیں شاعراں وتی شعر دپگال کت انت ۔ دومی بھرءِ جارچینیءِ ذمواری ھمل پرویزءِ کوپگان ات ۔

شاعریءِ دیوانا شرف شاد، ظفر کریم، غلام رسول کلمتی، حسن علی حسن، اسحاق خاموش، ملا مراد، غفور صاحبداد، دوست محمد دوستل، اسحاق رحیم، جبار غریب، چندن ساچ، شوکت ابرار، منصور قاضی،عزیز ارمان، غفار دوست، سعید خیاط، شاھد میر ، اصغر لعل ، سراج رحیم،ھانی عبدالواحد، جلیل حسین و دگراں گوں وتی پرمعنائیں شعراں دیوان دو دیوان کت۔