بلوچی سیاھگءِ راست نبیسگ؛ گوں 'ہ' سرجم بیوکیں گال

بلوچی نبیسگءِ وھدا لھتے گال أنت کہ آوانی کارمرز کنگا پد دروشم اش بدل بی أنت۔ ایش گوں 'ہ' آسر بیوکیں گال أنت۔

چوش کہ 'پسہ، قصہ، جلسہ، حیلہ، جیڑہ' و دگہ بازین گال۔

ایشاں لھتے مردم 'پسو، قصو، جلسو، حیلو، جیڑو' نبیس أنت۔

ظھور شاہ ھاشمیءَ سرکچ داتگ کہ دوئیں وڑ بروبر أنت۔ لبزانکءِ توکا دو راھبنداں بروبر منـّگ دیمترا بازیں جیڑہ اڈ کنت و وانوکاں بے راہ کنت۔

ایشانی کارمردی اگر چؤش کہ چیرا داتگ أنت، بہ بی أنت، شرتر إنت

پسہ: تئی پسّہ تچک إنت۔ تئی پسّواں مردم سرپد بوت أنت۔ یک پسّوےءَ من پوہ نہ بوتاں۔

قصہ: تئی قصہ دارجکش أت۔ قصوا گونڈ گر۔ قصواں شنگ کن۔ قصوے بیار۔

جلسہ: جلسہ کجا برجم بیگا إنت؟ جلسواں لیڈر گشتانک دی أنت۔ روچے یک جلسوے برجم دارگ بیگا إنت۔

حیلہ: روباہءِ حیلہ باز أنت۔ روباہءِ حیلواں شیر ھم سرپد نہ بیت۔ إیشی حیلوے إنت۔ جیڑہ: قومءِ جیڑہ باز أنت۔ جیڑواں ٹھینوکیں مردم واب أنت۔ غلامی پہ قوماں مزنیں جیڑوے إنت۔