بی ال افءِ ناما مردم کشوکیں سئے کسانی پاشک کنگا رند احمر مستی خانءِ خلافا بی ال اےءِ بیانے تالان بوت

 

بلوچستان لبریش فرنٹءِ ناما مردم کشوکین سئے کسانی نام احمر مستی خانءَ تالان کتگ اَنت و نبیستگ کہ ایشاں ایمنیں کیچ دمگا مردمانی نیاما بیمے دئور داتگ۔ آئیءِ ردا گوستگیں یک سالےءِ نیاما درزناں مردماں کشوکیں ‘ب ۔اسماعیل، الف ۔ندیم و جیم ۔یعقوب وتا بی ال افءِ کماندار ظاھر کنگا اَنت۔ ایشان سرکاری چاریگ بیگءِ نیمونا ھنچائیں مردم و سیاسی جھدکار کشتگ اَنت۔ (1)

ھمے حالءِ شنگ بیگا رند وتا بی ال اےءِ گوانکو ظاھر کنوکیں میرک بلوچ نامینےءَ بیانے احمر مستی خانءِ خلافا تالان کتگ۔ بیانءِ ردا ”لھتے وتگڑیں کواس دریں ملکاں نشتگ اَنت و پاکستانی چاریگانی سوجانی سرا کار کنگا اَنت۔ آزادیءِ راھشون و بلوچ جُنزءِ باروا اے بلوچ نامیں کواس بد گمانی جوڑ کنگا گولائیش اَنت۔ ھمے ایجنٹانی نیاما یکے احمر مستی خان اِنت کہ امریکاءَ نشتگ۔“ (2)

بی ال اےءِ ناما شنگ بیتگیں ھمے بیانءِ ردا احمر مستی خانءَ وتا گوں بی ال اے نزیک کنگءِ جھد کتگ تانکہ ھمے ناما شہ وتی درملکی سنگتاں زر بہ گریت۔ البت بی ال اےءَ گوں آئی نزیکی نہ کتگ۔ ھمے پڑا بے سوب بیگا رند نیں راجی جُنز و جُنزا نزیکیں راھشونانی باروا بد گمانی ودی کنگءِ واھگا آئی وتگڑ و دروگیں زبان کارمرز کنگا اِنت۔ (2)

البت، احمر مستی خانءَ اشارہ کتگ کہ آزادیءِ ناما براتکشی دارگ بہ بیت۔ بی ال اف ھم بے مھاریں باسکانی سببا گندگا نگیگ اِنت و گشیگا واھوک اِنت کہ بلوچستانءِ سیاسی گل و آوانی نیاما یک تپاکیے ودی بہ بیت۔ زانگ نہ بیگا اِنت کہ باریں بلوچستانءِ سیاسی گل، خاص نشنل پارٹی کہ آئیءِ جھدکار بی ال افءِ بے مھاریں باسکانی ناروائیانی آماچ بیتگ اَنت، گوں بی ال افءَ نندگا ساڑی اِنت یا نہ۔ آیوکیں وھد المّا گواہ بیت اِنت۔

نشنل پارٹیءِ سرا جتگیں سرکاری چاریگیءِ بھتان ھر کس ھرکسی دپانی بے بنیں گپ اَنت و ھچ ثبوت شنگ نہ بیتگ، بلہ روچتاک توار و دگہ حالجاھاں بازیں ھنچیں ثبوت بی ال افءِ پلانگری زیروکاں شنگ کتگ اَنت کہ نشنل پارٹیءِ گچینی جھدکارانی کشوکاں بی ال افءِ بے مھاریں باسکاں ظاھر کن اَنت۔ نشنل پارٹیءِ بیاناں گشگ بیتگ کہ یک خاصیں ٹولیےءِ مقصدانی پیلو کنگا آوانی مردم اش جتگ اَنت۔

(1)
http://www.examiner.com/foreign-policy-in-baltimore/baloch-terrorism


(2)
http://bamhal.blogspot.com/2011/10/blog-post_25.html