دروغیں گپے، من ایرانءَ جوھری سلاح اڈ کنگا کمک نہ کتگ: روسی سائنسدان

بلّی توریں امریکاءِ رسانکاں روسی سائنسدانےءِ نام داتگ کہ آئیا جوھر سلاح اڈ کنگا ایران کمک کتگ، بلہ سائنسدان گشیت ھچ کمک ئی نہ کتگ۔ اے خبر روسی حالتاکےءَ مرچی شنگ کتگ۔

جوھری توانائیءَ چاروکیں اقوام متحدہءِ اداروا وتی رپورٹءِ تھا اشارہ کتگ کہ ڈڈیں شاھدی ھست اَنت کہ یک درملکی کوّاسےءَ ایران کمک کتگ تانکہ High Explosives Detonation System جوڑ بہ کنت۔ اے رپورٹا داتگیں درملکی مردمءِ نام ظاھر کنگ نہ بیتگ۔

البت، واشنگٹون پوسٹءَ وتی شنگ کتگیں حالےءَ اے درملکی سائنسدانءِ نام Vyacheslav Danilenko شنگ کتگ۔ واشنگٹون پوسٹءِ ردا اے سائنسدانا تانکہ پنچ سالاں ایرانی کمک کتگ اَنت۔

روسءِ نامییں حالتاک Kommersant ءَ نام گپتگیں 76 سالگیں سائنسدان درگپتگ و شہ آئیا ایرانءَ کمکءِ باروا جست کتگ۔ آئیا گشتگ ”من جوھری فزیسسٹے نہ آں و من ایرانءِ جوھری پروگرامءِ بنھشت ایر نہ کتگ“۔ چدا گیشتر گپ کنگا آ ساڑی نہ بیتگ۔ زی نیوز ۔انڈیا