برطانیاءَ کٹریں مسلمانانی گلےءِ سرا بندش جت

برطانیائی مسلمانانی کٹریں گل ‘مسلم اگینسٹ کروسیڈرز‘ءِ سرا سرکارا بندش جت۔ اے گلا اولی میانملکی جنگا بند کنگءِ روچءِ یادگریءِ درگتا ظاھری دیگءِ جار جتہ بیتگ و جنگ بندیءِ یادا جوڑ کتگیں ربیدگی پُلاں سوچگءِ ارادہ کتہ بیتگ۔ ھمے ٹولیا گوستگیں سالا جنگ بندیءِ یادا جوڑ کتگیں پُل سوتکگ اتنت۔

جنگ بندیءِ روچ کہ Armistice Day ھم گشگ بیت 11 نومبر اِنت۔ ھر سال 11 نومبرءِ کلاک 11ءَ جنگا کشگ بیتگیں مردمانی یادا سرجمیں یورپی ملکاں یک دمانےءِ بیتواری بیت۔ پدا یادگاری جاگھاں پوپی پُل ایر کن اَنت۔ جنگا دستگٹیں ملکاں 11 ۔11۔ 1918ءَ صحل کتہ بیتگ۔

برطانیاءِ تھی کارانی وزیر ٹریسا مئےءَ گشت کہ اے گل الغرابہ، المھاجرون و اسلام فار یوکے گلانی مردمانی جوڑ کتگیں دگہ یک نامے اِنت۔ ایشیءِ سرا سال 2006ءَ میار لڈگ بیتگ کہ ایشی ٹروریسٹی کاراں ساڑائیت۔ ھمے بدیں کار گوں نوکیں نامےءَ ایشاں دمدار کتگ۔ پمشیا شہ انشپی 10 نومبرءِ شپءِ نیما ایشیءِ سرا بندش جنگ بیتگ۔ اے بندشا رند اے ٹولیءِ باسک بیگ یا ایشیءِ پلانگریا زیرگ جرمے حساب بیت اِنت۔ مئیل آنلائن