راجانی دوستداشتگیں مردم باز اَنت، بلہ چوشیں نام کہ شہ مِرَگا رند ھم راجا راھشونی بہ کنت، سک کم اَنت۔ میر غوث بخش بزنجو ھما نام اِنت کہ ماں بلوچستان و دگہ بلوچ ھنداں ھر بلوچءِ دلا انگت زندگ اِنت۔ انگت بازیں پارٹی و گل وڑے نہ وڑےءَ واھوک انت کہ وتا گوں غوثی نزیک بہ کن اَنت۔ وتا غوثیءِ پیما پروگریسو، دمکراٹ، استمان دوست و راست پسند پیشدار انت داں مردم آواں غوثیءِ وارث بہ لیک اَنت۔سال 1988ءِ گچینکاریاں شھیداعظم نواب بگٹی، سردار عطاءاللہ مینگل و قول داکٹر ملک طوقیءَ یاجوج ماجوج ھوار بوت اَنت و غوث بخش بزنجوءِ خلافا فرنٹے اڈ اش کرت و گچینکاریا گون بیت اَنت۔ اے گچینکاریا بلوچ استمانءَ رد وارت و میر غوثیءَ ووٹ دیگءِ بدلا آئیءِ مخالفاں ووٹ گپت۔
افسوس کہ غوث بخش بزنجو پشت نہ کپْت کہ رندی گچینکاریا بہ گندیت چونیں پرؤشے ھمے یاجوج ماجوجاں و آوانی اتحادیاں وارت۔ ادا بلوچ استمانا وتی پشومانی پیش داشت و مارت اش کہ کُچْکے کپیت دہ مجول ئی بھا انت۔
آواں کہ غوثیءِ سیاست و فلسفہ اش رندگیری کرتگ، وتی ھوشاں کموک کار بہ بند اَنت و سرپد بہ بی اَنت کہ اگر مرچی آ زندگ بہ بیتیں ات، آئیا بلوچانی سرا بیتگیں زوراکی مارتگ اتنت و راجءِ رکـّينگا شرتریں راھے شوھاز ئی کرتگ ات، بازیں سیاستکارانی ڈولا نہ نشتگ ات و وھد ئی لیب نہ داشتگ ات۔
وھدے نواب خیر بخش مری درانڈیہ کنگ بوت، سردارعطاءُاللہءَ وتا درانڈیہ کرت و شھید اعظم وتی ٹکءِ جیڑواں مانگیشنگ بوت و پہ راجی مشکلاں نہ رسگا ات، گڈا غوثی ھما مرد اَت کہ وتی راج ئی تھنا نہ رمبینت و ھر پڑا گوں شیواری، و کما شہ کم کوشارینگا وتی مردمانی پانکجنی ئی کرت۔
سرپدیں مردم زان اَنت کہ ھنچیں وھداں بلوچانی حقءِ گپ جنگ گناھے ات و غوث گوں دلیری راجی حقاں لوٹگا ات، گڈا چونکا مرچی کہ ھما مردم آ وھدی دشمنءِ دیما شہ ترسا یا وتی سیتانی خاطرا جکــّـتگ اتنت راجءِ پانکجن جوڑ بیتگ اَنت، بلہ غوثیءَ دگہ راھے گپت؟
مرچی اگر آ زندگ بیتین ات، شرتریں پیمیا وتی راجءِ نمایندگی ئی کرتگ ات۔ راجءِ درمیانا غوثیءِ بیگ سببا مرچی ھر بلوچءِ رتکگیں خونءِ ھر ترمپا رُستگیں سول ثمردیگا بیتگ ات۔ و بلوچ راج ثمراں ورگا اتنت۔
مفادپرست و رز پرست ھر کوشستے بہ کننت چوشیں راجپھاز کہ میر غوث بخش بیتگ شموشگ نہ بنت و میرءِ شونداتگیں کشک ھما ایوکیں کشک اِنت کہ بلوچ راجا دیم پہ منزلا بارت و رسینیت۔
هیچ نظری موجود نیست:
ارسال یک نظر
وتی کلوا چێرا نبیس إت