باندا دگہ چاردہ پل ماں بلوچ سرڈگارا سِرَپ أنت!

إیران دنیاءِ إیوکیں ملک إنت کہ مردمانءِ درنجگا پھر بندیت۔ أنگت گيئشتر پھر ھما وھدی بندیت کہ دگانءِ سرا اُستمانءِ دیما مردم درنجگ بہ بنت۔ خاص سنی۔ و سنی أگر بلوچ بہ بنت، گڈا آ چؤکہ ھپتارےءَ خر إش لیکیت و ڈلیت إش۔

ھمے ھپتاری واھگءِ دیما برگءِ مقصدا مرچی إیرانءِ کلاّنیں کورٹءِ جارے سرکاری رسانکاں شنگ کت کہ باندا 14 سنییں بلوچ درنجگ إبنت۔ إیشانءِ نیاما یکـّے عبدالحمید ریگی إنت کہ عبدالمالکءِ برات إنت۔

إرناءَ شنگ بیتگیں حالءِ ردا قاضیا دستبندی کتگ کہ ماں جندا۔۔۔ءِ بیڑاں کشگ بیتگیں شیعوانءِ کٹم باندا -سئے شنبہ 14 جولائیءَ صحبءِ کلاک 6:30ءَ پہ چاردھیں بنیادماں درنجگءِ کارکردءِ چارگا وتا بہ رسین أنت۔

چاردھیں کسانءِ سرا ڈوبہ إنت کہ آواں بلوچستانءِ أوارین جاھاں جندا...ءِ کماش عبدالمالک ریگیءِ گـشگءِ سرا مردم کشتگ و یا گوں سرکاری واکاں سلاحبندیں جنگ إش کتگ۔ پمیشا 'خداءِ سرڈگارءِ سرا فسادکار' منـّگ بیتگ أنت۔

پدردیں گپے إنت کہ إنسانی حقانءِ پانکجیں سرجمیں میاں اُستمانی گل و بنجاہ إیرانءَ توسینتگ أنت۔ نیں إیشاں بے توار أنت۔ پرچاکہ چدا پیسر شہ إیران کتگیں دستبندی اودءِ سرکاری واکاں یکـّوئی ڈالچار کتگ أنت۔ مردم سر بتگ أنت کہ گوں إے ڈولیں جاوراں چے کنگ بہ بیت!

بلوچ سیاسی گلانءِ سرجمیں تچ تاچ ھم بے سیت أنت۔ إیشیءِ سبب وا باز أنت، ألبت سرپدیں مردمانءِ خیالا شہ أولسرا جندا۔۔۔ءِ باروا تچکیں لیکوے ظاھر نہ بیگءِ سببا گِسریں مردم جندا۔۔۔ءِ ناسرپدی و إیرانی واکانءِ زوراکیانءِ آماچ بیگا أنت۔

لھتے کسانءِ خیالا قومدوستیءِ بٹاکا جنوکیں بلوچ لیڈر کارے کنگءِ بدلا بلوچاں گيئشتر تاوانبار کنگا أنت۔ آ شھید أعظم أکبر شھباز بگٹیءِ گشتنءِ مثالا دی أنت کہ آئی گشتگ أت '۔۔ ھورکیں (بے عملیں) خبر مردماں دغا دیگ حساب إنت'۔

ترانگ بہ کپ إت کہ إیرانءِ تھی سرکار مخالفیں ٹولی کہ آواں جھلاد و برزاد 'رنگ سبز، رنگ سبز' کت، بلوچانءِ کشگ بیگءِ وھدا کرّ، کور و گـُنگ أنت۔

إیرانءِ واکدار و سرکار مخالفیں شاؤنست بہ زان أنت کہ بلوچاں درنجگءِ کارکرد نہ کـٹـّینیت۔ نے کہ سلکاری و فسادکاریءِ دیما درنجگ داشت کنت۔ خاص درنجگ بیتگيں سیاسی فکرانءِ واھند دیم پہ إنقلابے آرگا راھییں پند رواجانءِ واستا سیمرغ درؤشمیں سواری إبنت کہ آوانءِ منزلا نزکتر یاریت۔
Rights reserved by www.balochinews.com