پہ واناکتر کنگ و لبزانکی قالبا إیر کنگءِ مقصدا لھتے گال پُشت و دیم کتگ أنت۔ و تکراری گال و یا گالرد در کـُتگ أنت۔چیزے روچ ساریا روچتاک 'آساپ'ءَ یک حالے گوں واجہ عبدالنبی بنگلزئیءِ عکسےءَ شنگ بوت۔ حالا داتگ أت کہ عبدالنبی بنگلزئی آساپءِ کارگسا شتگ تاکہ بی إس او –آزادءِ نیمگا آساپءِ بائیکاٹا کٹــّینگءِ باروا گپ بہ کنت۔ إے حالا ھمُک سرپدیں بلوچ حیراں کت۔
پرچاکہ پہ بلوچانءِ حقاں آساپ گوں حکومت و زوراکیں واکاں مڑگا إنت۔ حکومتءِ قھر ھمے روچتاکءِ سرا گوارگا أنت۔ سرکاری إشتھار کہ پہ أخباراں مزنیں ڈیکییے أنت؛ پہ آساپ 'سجر ممنوعہ' أنت۔
ھمے روچتاکءِ واھند –واجہ جانمحمد دشتیءِ سرا ھم حکومتی عزاب نازل بیتگ أنت۔ آئیا وتی کٹمءِ لاپ بُرّ تگ و ھمے آساپ ردوم داتگ۔ باز براں پادتراپ إش داتگ کہ وتی ھؤشا سرا بہ کنت؛ گشتگ إش کہ باز راجدوستی آئیءِ سرا تاوان دات۔
آفرین بات جانمحمدءِ کوھیں جگرا کہ آئیا پدا ھم راجی حقانءِ پانکجنی برجاہ داشت، تاں آوھدی کہ جوریں بداں وتی تیرانءِ آماچ کت۔ ألبت بلوچ راجءِ نیکیں دعایاں آئیءِ جان رکــّینت۔
جست إیش إنت کہ گوں آساپءِ بائیکاٹ کنگا بی إس او –آزاد چے فکرے ردوم دیگ لوٹیت؟ بائیکاٹءِ سیت کےءَ رستگ أنت؟
ھر ساریں مردم سرپد إبیت کہ إے بائیکاٹءِ سیت بلوچ راجا نہ رس أنت۔
ڈنی مردمانءِ أخبار ھمک سال کروڑاں روپیا شہ بلوچستانءَ بر أنت۔ إے أخبارانءِ کار بلوچءِ ھـُنڈالاں برّگ و آواں گوَجگ إنت۔ بی إس او پرچا آوانءِ بائیکاٹا نہ کنت؟ بائیکاٹ وتی جاھا، آوانءِ خلافا گپے کسا نہ جتگ۔
بی إس اوانءِ کاراں مردمءِ سر پر نہ بیت۔ کس نہ زانت إے چے لوٹ أنت! ھما سروک کہ پہ بلوچءِ حقــّا کوکـّار کنت؛ آئیءِ خلافا أنت۔ ھما حالتاک کہ بلوچءِ حقءِ گپا کنت، آئیا بائیکاٹ کن أنت! عجیبیں کار أنت، عجیبیں کرد أنت!
1987ءَ وھدے بی إس او وتی زوران أت، گڈا ھمے وڑیں کارے کت ئی۔ آوھدییں جام غلام قادرءِ خلافا کارے کنگءِ جاگھا آواں وتی سرجمیں واک میر غوث بخش بزنجوءِ خلافا کارمرز کت۔ ھمے پیما دگہ زبانانءِ أخبار و ماھتاکانءِ بدلا ماھتاک بلوچیءِ بائیکاٹ إش کت۔
بزنجوءِ مخالفتءِ سیت جام غلام قادر و آئیءِ ھمسنتاں رست أنت کہ بادے مرچی بلوچءِ گٹّءِ ساد أنت و بلوچیءِ بائیکاٹءِ سببا درامدیں زبانانءِ حالتاک و ماھتاکاں سوب کـُت۔
پمیشا شه بی إس اوانءِ سرپد و إیمانداریں باسکاں ما دستبندی کنیں کہ وتی ھؤشا سرا بہ کن أنت، بہ نند أنت و وتی کرداں بہ چار أنت؛ باریں آ گوں وتی إے وڑیں کارکرداں جندءِ دست و پاداں گڈ ّگا نہ أنت!؟ أگر ھنچؤش إنت، گڈا وتی سرا بہ گر أنت۔ تاکہ پدا سر إش ماں گٹــّاں مہ کپیت و ھما 1987ءِ سیاھیچکاں بزگيں راجءِ دیما پدا مہ موش أنت!
Source: ماھتاک بلوچی
هیچ نظری موجود نیست:
ارسال یک نظر
وتی کلوا چێرا نبیس إت