بلوچستانءِ کارباری جاگہ، دمگ، دگ و بازار تلپ أنت

شھید أعظم نواب أکبر شھباز بگٹیءِ شھادتءِ سئمی سالروچءِ درگتا سرجمیں بلوچستانءِ شھر، کلـّگ و میتگانءِ کارباری جاگہ تلپ أنت۔ دگــّاں گاڑییے گواہ نہ کنت۔ دکان و رسٹورانٹ بند أنت۔ مردم شہ وتی لوگاں در نہ کپتگ أنت۔

إیوکیں توار کہ گوشان کپ أنت؛ سرمچارانءِ ألگچ کتگیں راکٹ أنت۔ یا فوجی و سرکاری بنجاھانءِ سرا برتگیں بیڑانءِ درگتا کلاشنکوفی تیرانءِ توار أنت۔

إیشانءِ کشا لھتے جاھاں کہ قران وانگ بیگا إنت، گڈا تلاوت کنوکانءِ توار إشکنگ بیگا أنت۔

۔

لوگ و کارجاگھانءِ سرا بلوچستانءِ بیرقءِ کشا سیاھیں بیرق ھم ٹال أنت۔ سیاھیں بیرق شھیدءِ سالروچءِ وھدا سوگ دارگا شون دی أنت۔

26 آگستءَ شھید أعظم نواب کبر بگٹیءِ سالروچءِ درگتا کاربندیءِ لوٹ بلوچ نشنل فرنٹءَ کتگ أت و إیشیءِ پلانگری سرجمیں بلوچدوستیں گلاں زُرتگ أت۔

کوئٹہءِ ھوریا ماں گوادر، تربت، نوشکی، دالبندیں، خضدار، قلات، مستونگ، حب، مچ، ڈیرہ بگٹی، تمپ، مند، آواران، پنچگور، بیلہ و آدگہ کسان و مزنیں میتگانءِ زمین و زمان سوگی أنت۔

سرکارا ماں کوئٹہ إمَرجنسی قانون رواج داتگ و سرجمیں مچّیانءِ سرا بندش ئی جتگ۔ پہ إے مقصدءِ پیلو کنگا 5000 ھزار پولیس ھم آرگ بیتگ أنت۔ سیمسری فوجی شہ پیسرا خاصیں دگ و چارراھانءِ سرا اوشتوک أنت۔

بی بی سیءِ ردا شہ کوئٹہ دیم پہ تفتان یا سکھر رئوکیں دگ تلپ أنت۔ یک گاڑییے گواہ نہ کنت۔ کوئٹہءِ سرکاری کاجاھاں کارمند نیست إنت و کورٹانءِ سرجمیں داد رسی دیوان بلوچ وکیلاں تھروز کتگ أنت۔

۔

ھمے درگتا کوئٹہء مشرقی نیمگا یک بمبتراکےءَ یک پولیس و دگہ دوکس ٹـپّی کت أنت۔ ألبت بلوچ رپبلکن پارٹیءِ سرباز بلوچءِ ردا 10 فوجی کشگ بیتگ أنت۔

دوشی ھم کوئٹہ خضدار و بولانءَ بمبتراک و راکٹانءِ کپگءِ توار إشکنگ بیتگ أنت۔ آوانءِ سببا یک کسے کشگ بیتگ۔ بلوچ رپبلکن پارٹی و بلوچستان لبرئشن آرمیءَ ذمواری وتی سراں زرتگ أنت۔

بلوچ گل و اُستمانءِ تپاکیءِ شرتریں مثال مرچی ماں بلوچستانءَ ودی إنت۔ إیشیءِ گِندگا دشمنانءِ چم جُرّ أنت۔ آوانءِ رسانکجاهاں کار کنوکیں حالکار نــُکّ نادوک أنت و پہ وتی چاروکانءِ سھیگ کنگا تچکیں گال إش نہ رسگا إنت۔
Source: www.balochinews.com