آساپ بندگ و دگہ دو أنگر بوت أنت، بلے ھچ کسا گـَرَز نه إنت

چپ چاگردا فوجیانءِ أنگـرّا بیگا رند، پہ بند بیگا آساپ مجبور بوت۔ ھمے کہ آساپءِ گڈی تاکا بندیءِ جار پرّینگ بوت، حال آتک کہ روچتاک آزادی و بلوچستان إکسپرئسءِ کارگس أنگـرّ أنت۔

روچتاک آساپءِ سرشونکار واجہ جانمحمد دشتیءَ کـشگءِ ناکامیں جھد ھم کنگ بوت۔ رندا أنور ساجدی ھم بیمتراپ دیگ بوت و أنگت أنور ساجدی گوں ترس زند گوازینگا إنت۔ شہ إیشاں پیسر روچتاک توارءِ گارگسا بیڑ برگ بوت و آئی فرنیچر پرؤشگ بوت أنت۔

إے کلــّیں ناروائیانءِ خلافا ھچ کسا پاکستانی واکدارانءِ نزوری و یا ناروائی إیر نہ جت أنت۔ بلوچستانءِ سرکار، سیاستکار، سرکاری پگار وار و اودا کاربار کنوکیں زردار پھک بے ترکّ توار أنت۔ ھچ کسءِ گوشا مورےءَ نہ وارت۔

ھرچے کہ بیتگ، وا بیتگ؛ ضروری ھمیش إنت کہ بلوچ حالتاکانءِ شونکار مہ شموش أنت؛ مدام یاد إش بہ بیت کہ کجا کارانءِ برکتا بلوچاں آ ستا داتگ أنت و کجا نزوریانءِ سببا آ تاوانبار بیتگ أنت۔ تاکہ وتی ھمے وڑیں نزوریانءِ سببا دیمترا إنچوکیں مزنیں تاوانے قوما دیگ مہ بیت۔

شہ آساپءِ بند بیگا، ملک سراج تھروز کنگا، بلوچستان إکپرئس، آزادی و روچتاک توارءِ مھتل بیگا بلوچستانءِ ھما بلوچ بزگ إبنت کہ آوانءِ سرا بیتگیں زوراکی ھمے روچتاکانءِ برکتا دنیاءِ دیما تالان بیتگ أنت۔

پہ یک حالکارےءَ سک ضروری إنت کہ آ دشمنانءِ پندلان بہ زان أنت۔ چدا ساری بلوچستانءِ میڈیا بلوچ دشمنانءِ دستا بیتگ۔ ھمیشیءِ برکتا بلوچانءِ بدواہ مزنیں زردار جؤڑ بیتگ أنت و بلوچاں چؤش کہ بے زبانیں گنگداما زند گوازینتگ۔ نیں کہ بلوچاں دیما آیگ بنا کت، گڈا ھمے بلوچ دشمنیں میڈیاءِ لاپ لگت جَنـَگ بوت۔

پمیشا آساپءِ بندیءِ سببا جنگ، جسارت، نوائے وقت، دنیا و دگہ بازیں گل کن أنت کہ پـلپانچءِ راھا إیرے یک کـُنٹگے دیر کنگ بیت۔ بلوچ حالکار جھد بہ کن أنت کہ چشیں نزورییے آوانءِ دستا سَرزَد مہ بیت کہ آئیءِ بَروَرد پہ بلوچءِ بدواھاں شادھیءِ سبب بہ بنت۔
Source: www.balochinews.com