دمکراسی إیش إنت؛ بی إس او -پجّارءَ نوکیں سروک گچین کت أنت

بلوچ إسٹوڈنٹس آرگنائزئشن -پجّارءِ 18همی بنجاھی دیوان سرجم بوت۔ سئے روچ پد ماں پدی نشستاں رند گلءِ باسکاں پہ وت نوکیں سروک گچین کت أنت۔

جنگ آنلائن شنگ بیتگیں حالءِ ردا بی إس او -پجّارءِ دیوانا وتی پیسری کارانءِ سرا بحثانءِ آسر بیگا رند پہ بنجاھی ذموارانءِ گچین کنگا مشکور بلوچءِ سروکیا سئے کسی گچینکاری کمیٹیءِ ٹھینت۔ آدگہ دوئیں باسک سلیم بلوچ و عطا بلوچ إتنت۔

ووٹاں رند گچینکاری کمیٹیا سوبین بیتگیں مردمانءِ نام و ذمواری ظاھر کت أنت۔ إیشانءِ ردا بنجاھی سروک حلیم بلوچ و بنجاھی کارگشاد آغا ربنواز شاہ گچین بوت أنت۔ أولی چیردستیں سروک أمین دوست بلوچ و دومی عبید بلوچ گچین بوت أنت۔

آدگہ ذموارانءِ نیاما أولی چیردستیں کارگشاد أنور أسلم و دومی جھانزیب بلوچ إنت، و حالرسان کارگشاد أسلم بلوچ إنت۔

پہ بنجاھی کمیٹیا چیرا داتگیں مردم گچین بیت إنت: چنگیز بلوچ، رحمت بلوچ، وڈیرہ جمیل، عارف صالح، کامریڈ ظھور بلوچ، داکٹر شکیل، غفار رحمان و بالاچ برکت۔

بلوچستانءِ ذمواراں پاگواجہ محمد جان، پاگواجہءِ أولی چیردست نور أحمد، دومی چیردست آغا داؤد شاہ، کارگشاد حمید بلوج، کارگشادءِ أولی چیردست رفیق بلوچ، دومی ظھور بلوچ و حالرسان کارگشاد سمیر بلوچ سوبین بیت أنت۔

لایق دلگوشیں گپ إیش إنت کہ بی إس اوءِ آدگہ دوئیں ٹولیاں (متحدہ و محی الدین) ھم إمبری؛ وتی منـّا گچین کاری کت أنت۔ ألبت آواں وتی ھما پیسری سروک پدا نندارینت أنت۔

بی إس اوءِ پیسری سروکاں پدا گچین کنگءِ کارکرد إے گلءِ 42 سالگیں دپترا کم دَروَر إنت۔ و گلءِ جمھوری راھبندءِ پادمالی إنت۔ ألبت ھمے پجّار ٹولی أصلی بی إس او زانگ إبیت و شہ إیشیءِ نیمگا جھموری راھبندا برجاہ دارگ نیکیں پالے إنت۔
Source: www.balochinews.com