مشرقی بلوچستانءَ پہ پاکستانی و میان اُستمانی حالجاھاں أنگریزی زبانا حال و خبر نبشتہ کنوکیں بلوچ حالکار ملک سراج أکبرءَ یک پاکستانی ٹولییے بیمتراپ دیگا إنت۔ إے ٹولی کہ سروک ئی لھتے پنجابی حالکار أنت؛ زھر گپتگ کہ ملک سراج أکبرءَ یک سیاھگے پہ ھندوستانی حالجاہ 'ٹائمز آف إنڈیا' نبشتہ کتگ۔ملک سراجءِ سیاھگ 'شہ تھا چست بیتگیں جیڑہ' سرحالءِ سرا قلات ریاستءِ آزادیءِ روچا شنگ بیتگ۔ إے سیاھگ سرجمیں بلوچ و بلوچدوستاں پسند کتگ۔ پرچاکہ إیشیءِ تھا بلوچستانءِ سرا بیتگيں بازیں ناروائی شون دیگ بیتگ أنت۔
ترانگ بہ کپ إت کہ بلوچستانءِ جیڑہ مدام درامدانءِ زبانا بیان کنگ بیتگ أنت۔ ألبت ملک سراج و آئیءِ ڈولیں دگہ بلوچستانی حالکارانءِ سرکشگءِ برکتا نیں بلوچستانءِ وتی حالکارانءِ زبانا جاور دنیاءِ دیما تچک تچکا ظاھر کنگ بیگا أنت۔ إیشی سببا بلوچستانءِ مِلک و مڈیاں وتی میراث منـّوکیں درامد سربتگ ترّگا أنت۔
ملک سراجءِ ترسینگا پد پاکستانی واکداراں دوشی روچتاک 'آساپ'ءِ دپترا بیڑ برتگ و اودا پروشت پرؤش کتگ۔ ألبت إے ناروائیءِ سرا تانگہ 'پاکستان فڈرل یونین آف جرنلسٹ' بے توار إنت۔ ألبت ھمے ٹولی ملک سراج أکبرءِ سرا 'ملکا إیرجَنگ و ھندوستانءِ چاریگ بیگ'ءِ ڈوبہ جَنگا إنت۔ ھمے عذرا ملک سراجءَ شہ تنظیمءِ باسکیا درکنگ و حالکاریا مھن کنگءِ جهد بیگا إنت۔
Source: www.balochinews.com
هیچ نظری موجود نیست:
ارسال یک نظر
وتی کلوا چێرا نبیس إت