راجدوستیں بیلاں پت کن إت

لچّه: عبدالمجید گوادری

دلگوش: إے لچّہ ھما ٹولیءِ سرا پربندگ بیتگ کہ 1988ءَ بلوچستان نشنل ألائنسءِ ناما میر غوث بخش بزنجوءِ خلافا تپاک بیت أنت و پاکستانی پارلمنٹا شت أنت۔ إے ٹولیءِ تھا بی إس اوءِ هوریا بی إن إم و مینگل ٹولی گوں وتی آ وھدییں دوستاں ھؤر إتنت۔

رندا کہ ألائنس پروشت، گڈا عبدالحئی و داکٹر عبدالمالک بلوچءَ گوں وتی ھمسنتاں پشومانی درشان کت۔ ھمے پشومانیءِ سببا رندترا آ گوں میر بزنجوءِ منـّوکانءِ گل نشنل دموکراٹک پارٹیا ھور بیت أنت و نوکیں گل 'نشنل پارٹی' إش جؤڑ کت۔

نشنل پارٹی مروچی بزنجوءِ فلسفہءِ دیما بروکیں مزنتریں گل زانگ بیگا إنت۔ ھمے برکتا رؤتگ ئی ماں بلوچستانءِ ھر دمگا إیرنشتگ أنت۔

کتاب: سوسنیں گیوار، تاکدیم 44

سر جھل شت و...
چـــــــــــــم چست نہ بنت
پولنگ کت أنت لبءِ لـُـڑا
آجـــــوئیءِ سُرنا جت إش
ناچ بوت گوں ڈھل و دُکـّرا

شؤر و کُـڑاس بیت ھر گورا
بانگ و صـلات چؤ کــُکـّڑا
کـَد گـرند إتش، کد گـُـرّ إتش
چوش کہ نہ گواروکیں جُـڑا

ھچ إش نہ کت...
آتک و شُــــــــــــــــت أنت
بید چہ چلــــمـّی گــڑ گــڑا
زردانءِ مِھر إش مونگلینت
کـَـــستانءِ آسءِ چـــــلـّـــڑا

بوت أنت شکین دیم ھر گورا
وت ماں وتءِ جنگ و کـُڑا
توشگ شت و مُبدا شت أنت
ترشیپ إش شُت گوں چیرمـُڑا

ھرچے شتگ، بید چــــــرنیءَ
إے ھم به رئوت چؤں بیت گڈا
راھشونے ھنچیں دَرچـِـــن إت
راجا مہ درؤھیت لـَــــکـّــُــڑا

راجدوستیں بیلاں پت کن إت
رکــّین إت ڈیھـــــــــا ھر وڑا
ســَربیا أنت راھبند تنگـــــھیں (1)
دود و بلــــــوچـــــــانءِ مڑاہ

(1) سر بیا أنت= پشت کپ أنت، به رَکّ أنت