إیرانءِ ھنـّیگیں یا پیسری واکدار پہ زور عربانءِ 'زر'ءَ خلیج فارس گشگا أنت۔ راستی إیش إنت کہ 'خلیج عرب'ءِ دوئیں دیماں شہ بُندرا ھچ فارس جاھمنند نہ بیتگ۔ ھردوئیں نیمگاں نندوکیں مردم عرب أنت۔ چیرگوَرا أمارات، دوحہ، سعودی، بحرین و کویت أنت، و سرترا عراق إنت۔ إیش پھک عرب أنت۔ آدگہ دیما إیرانءِ زور داشتگین ھند ألاحواز إنت کہ اودا نندوکیں مردم ھم عرب أنت کہ پہ وتی آزادیا سالاں سال إنت إیرانءِ خلافا جنگا أنت۔ إنچو راستیانءِ موجودیا إیرانی واکداراں أنگت ھُجّ کتگ کہ إیشی خلیج فارس إنت۔
ھمے إیرانی وتی زورگپتگیں ھنداں نندوکیں مردماں إیرانیءِ ناما یکـّوئی پادمال کنگا أنت۔ پادمالیں قوم زانگا أنت کہ زوراکیں فارس واکانءِ واھگ آوانءِ سرڈگاراں آوار جنگ و دودمانان برباد کنگ إنت۔ ألبت إیرانیءِ ناما دستگٹیں فارس گشگا أنت کہ چؤش نہ إنت؛ یکـّیں خبر إش داشتگ کہ پھک إیرانی أنت۔
أگر فارسانءِ خبر منـّگ بہ بیت و ھمے حساب کنئے کہ 'پھک إیرانی أنت'، پرچا إیران 'خلیج فارس'ءِ نامءِ دارگا چؤش ھدوناک إنت؟ وھدے رضا قلدرءَ ملکءِ نام شہ فارس مٹـّینت و إیران کت، گڈا پرچا ھمے خلیجءَ خلیج إیران کنگا ھنوکيں واکدار زور نہ دی أنت؟
پدا بہ چارئے أگر ھنوگیں إیران سرکار إسلامدوستیں سرکارے إنت، گڈا شہ فارس و فارسیءَ إسلامی زبان عربی و پیغمبر و علیءِ قوم عربءَ مقدستر بیگ لوٹتگ أت۔ ھنچؤش کہ بلوچستانءِ شھر و کلـّگانءِ ناما مٹـّینگ و إسلامی یا إیرانی کنگا إنت، پرچا آتشپرستی نامان مٹـّینگ و إسلامی کنگا ھنـّیگیں رژیم ساڑی نہ إنت؟
پھکیں جُستانءِ پسـّو یکـّین إنت کہ إیرانیاں إسلامءِ دوستی نیست إنت، نے کہ ھمساھگیں عربانءِ سنگتیءِ واھگ۔ ھوریا وتی دستءِ چيرا نندوکیں غیر فارسانءِ وشّیا ھم واھوک نہ أنت۔ إیوکا وتی نسلپرستی لیکـّوان ردوم دیگ و کش گوری قوماں پادمال کنگا إیرانءِ ناما کارمرز کنوکیں فارس واکدار دلمانگ أنت۔ ألبت آواں زانگ لوٹیت کہ زوراکیانءِ دئور کٹـّگا أنت۔
هیچ نظری موجود نیست:
ارسال یک نظر
وتی کلوا چێرا نبیس إت