وھدے کہ بولان ھار کنت، بازیں سرانا سار کنت

شہ روچتاک توار زرتگیں عکسا نشنل پارٹی نوشکیءِ جھدکار ودی أنت

بلوچ سیاسی جھدکارانءِ دستگیر وبیگواہ کنگءِ خلافا نشنل پارٹیءَ یکـّیں روچا ماں مشرقی بلوچستانءِ سرجمیں ھنداں ظاھری دات۔ گوں إے ظاھریاں پارٹیا ثابت کت کہ آئی یک قومی پارٹییے إنت و مشرقی بلوچستانءِ ھر ھندا آئیا پلانگری زیروک ھست إنت۔

زییں روچا یکـّیں وھدا ماں تربت، پنجگور، گوادر، حب، لسبیلہ، خضدار، مستونگ، نوشکی، دالبندین، بولان، سبی، نصیر آباد وجعفر آباد پارٹیءِ جھدکار لشکرانءِ درؤشما راھا کپت أنت۔ إیش وتی وتی شھرانءِ دمک و دگـّاں ترّ إتنت۔ ماں راھا پاکستانی سرکارءِ کارکردانءِ إیرجنگا وڑ وڑیں دانک إش کوکـّار کت أنت۔

نشنل پارٹیءِ سریں باسک چؤش کہ داکٹر عبدالحئی، غنی پرواز، حاجی فدا أحمد دشتی، مھیم خان بلوچ، رجب علی رند، عبدالغنی رند و دگہ گچنی کماشاں گوں مچّیاں تران کت۔ وتی تراناں إیشاں پاکستانی سرکارءِ بندیگیں سیاسی بلوچ جھدکارانءِ آزادیءِ لوٹ کت۔

إیشاں گشت کہ ھنوگیں سرکار و چدا پیسری سرکارءِ نیاما تـُشے فرق ھم نیست إنت۔ یکـّیں وڑا ھردوئیناں بلوچ وتی زوراکیانءِ دیمپان کتگ أنت۔ تران کنوکاں سرکچ دات کہ تاں ھما وھدی وتی سرڈگار و آئی ملکتانءِ واھند بلوچ وت مہ بنت، آ خرسندیا نہ نند أنت۔ آوانءِ جھد برجاہ مانیت۔

ھینری بلوچ نامیں یک جھدکارےءَ گشت کہ إے وھدی بلوچستانءِ سرا پاکستانءِ پنچمی فوجی آپرئشن بیگا إنت۔ إیشیءِ سببا ھزاراں نوجوان چکـّانپگ بیتگ أنت۔ ھمے راھا بلوچانءِ سرا کـُلہ دیم دیگ بیگا إنت کہ آ غلام أنت۔ ألبت بلوچ اُستمانءَ إے وڑیں زوراکی شہ وتی راجی زرمبشا پدا داشت نہ کن أنت۔ زوراکیانءِ سببا پد کنزگءِ بدلا بلوچ گيئشتر ھمّت کن أنت ۔

لھتے بلوچ جھدکارانءِ ڈوبارگانءِ دیمپانیں نشنل پارٹیءِ بُست کنگءِ حالانءِ وانگا پد مردم گلخان نصیر شعرےءِ ترانگا کپیت کہ گشیت:

وھدے کہ بولان ھار کنت۔ ۔ ۔ بازیں سرانا سار کنت

اُمید إنت کہ مخالف نیں وتی سراں سار کن أنت و نشنل پارٹیءِ جھدکارانءِ ھمراھیا بلوچستانءِ مردمانءِ سرا بیتگیں زوراکیانءِ خلافا وتی جھدا دیما بران کن أنت۔

روچتاک إنتخاب و توار شنگ بیتگیں حالا دیمترا داتگ کہ مرچی؛ 26 فروری 10 ءَ ھم نشنل پارٹیءِ سریں جھدکارانءِ سروکیا ماں کوئٹہ مچّییے برجم دارگ بیت إنت۔ پارٹیا شہ وتی سرجمیں باسک، جھدکار، پلانگری زیروک، بلوچ و بلوچستانءِ دوستاں بھر زیرگ دستبندی کتگ۔

بلوچی نیوز