قرانءِ تاکبندےءَ سوچگءِ ارادہ کنوکیں کرسچن عالم ایرجنگ بیگا انت

داتگیں عکسا یک ایٹالیائی جنیں آدمےءَ قرانءِ تاکبندے گون انت کہ لیباءِ صدر قدافیءَ وتی ترتابءِ درگتا تحفه داتگ۔ عکس پھرہ ءِ منـّتا

یک امریکائی کرسچن عالمےءَ ارادہ کتگ کہ آئی 9/11ءَ امریکاءَ ٹریڈ سنٹرءِ سرا حملہ کنگءِ سالروچءِ درگتا قرانءِ تاکبندے سوچیت۔ اے کرسچن عالمءِ ارادہ ماں امریکا و درملکاں ایرجنگ بیگا انت۔

ماں افغانستان نندارینتگیں امریکائی فوجءِ کماندارا گشت کہ اے کارکرد بازیں امریکائیانی جانسلامتیا خطرانی تھا دئور دات۔ افغانستانءِ صدر حامد کرزئیءَ ھم اے ارادہ ایرجت۔

اودا ماں پاکستان نندارینتگیں امریکائی سفارتکارا ھم 'فلورڈائی' عالمءِ ارادہ ایرجت۔ آئیا گشت کہ ایشی پہ زانت مسلماناں زھربرائینگءِ پندلے انت۔ آئی لوٹ کت کہ اے ارادہ پیلو کنگ مہ بیت۔

ٹری جونز نامیں عالما گشت کہ آئیا سرجمیں دستبندی رستگ انت، بلے وتی ارادوا یلہ دیگءِ فیصلہ ئی نہ کتگ۔

11 سپتمبر 2010ءَ لھتے امریکائی بالیگراب گوں سواریں مسافراں چکانپگ بیتگ اتنت و گوں 'ورلڈ ٹریڈ سنٹر'ءِ دو ماڑیاں ڈیگ وارینگ بیتگ اتنت۔ ایشیءِ سببا دوئیں ماڑی بنگپتگ اتنت و آوانی تھا کارا دستگٹیں صداں مردم کشگ بیتگ اتنت۔